عزاداری امام حسین (ع) پر ہزاروں ناصر عباس قربان کرنے کیلئے تیار ہیں، پروفیسر شاہد عباس

گذشتہ رات لاہور میں شہید ہونے والے تحریک نفاذ فقہ جعفریہ پاکستان کے مرکزی رہنما علامہ ناصر عباس کے چھوٹے بھائی پروفیسر شاہد عباس نے کہا ہے کہ علامہ ناصر عباس کی شہادت قومی نقصان ہے، وہ اپنی ذات کے اندر ایک جماعت کا کردار ادا کر رہے تھے۔ اس موقع پر چونگی نمبر پر واقع شہید علامہ ناصر عباس کے گھر پر اہل علاقہ، عزیز و اقارب، دوست احباب اور مذہبی رہنمائوں کی آمد کا سلسلہ جاری ہے۔ شہید علامہ ناصر عباس کے بھائی پروفیسر شاہد عباس کا کہنا تھا کہ عزاداری امام حسین (ع) پر ہزاروں ناصر عباس قربان کرنے کے لیے تیار ہیں۔ یہ عزاداری ہی ہے جس سے اسلام کی بقاء ہے، ہمیں حکومت سے کسی قسم کے انصاف کی توقع نہیں ہے۔ اُنہوں نے کہا کہ دشمن ہمیں قتل کرکے عزاداری کے خلاف قدغن لگانے کی کوشش کر رہا ہے لیکن ہماری عزاداری کی ابتدا ہر شہید کی شہادت سے ہوتی ہے۔