مجلس وحدت مسلمین قوم کو سیاسی شعور دینے میں کامیاب ہوگئی ہے، ناصر عباس شیرازی
مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی نے کہا ہے کہ ایم ڈبلیو ایم پاکستان میں ہر مظلوم کو سہارا دے گی اور ہر ظالم کا قلع قمع کرے گی۔ ان خیالات کا اظہار اُنہوں نے مجلس وحدت مسلمین ضلع ٹوبہ ٹیک سنگھ کے زیراہتمام منعقدہ سیاسی سیمینار سے خطاب کرتے ہوئے کیا۔ سید ناصر عباس شیرازی کا کہنا تھا کہ مجلس وحدت مسلمین پاکستان میں ایسے نظام کی جدوجہد کرے گی کہ جس میں ہر مظلوم کا ساتھ دینا اور ظالم کے خلاف آواز بلند کرنا ہر سیاسی جماعت کی مجبوری بن جائے گی۔ اُنہوں نے کہا کہ مجلس وحدت مسلمین قوم کو سیاسی شعور دینے میں کامیاب ہوگئی ہے۔
ناصر عباس شیرازی کا مزید کہنا تھا کہ مجلس وحدت مسلمین نے پاکستان میں پہلی بار ایک بلائند کو ٹکٹ دی ہے اور اس کے ساتھ ساتھ مجلس وحدت مسلمین پاکستان کے پلیٹ فارم سے اہلسنت برادران کو بھی ٹکٹ دی ہے۔ ہم پاکستان میں صرف تشیع کے حقوق کا خیال نہیں رکھیں گے بلکہ حقیقی اہلسنت کو بھی جو زیرعتاب ہیں، ان دہشتگردوں کے چنگل سے آزاد کرائیں گے۔ اس موقع پر اُنہوں نے مجلس وحدت مسلمین کے اُمیدوار کا اعلان کرتے ہوئے شرکاء سے عہد لیا کہ رانا فدا حسین ایڈووکیٹ کو کامیاب کرائیں گے۔
