القاعدہ کی ویڈیو کے بعد ہندوستان میں ہائی الرٹ
دہشت گرد تنظیم القاعدہ کی طرف سے ہندوستان میں شاخ قائم کئے جانے کے اعلان کے بعد حکومت ہندوستان نے پورے ملک میں ہائی الرٹ جاری کردیا ہے۔
اطلاعات کے مطابق القاعدہ کے سربراہ ایمن الظواہری نے انٹرنیٹ پر جاری کی جانے والی ایک ویڈیو میں ہندوستان میں اپنی تنظیم کی شاخ قائم کرنے کا اعلان کیا ہے۔اطلاعات کے مطابق ایمن الظواہری نے انٹرنیٹ پر عربی اور اردو زبان میں 55 منٹ کی یہ ویڈیو جاری کی ہے جس میں اس نے کہا ہے کہ برصغیر میں القاعدہ کی نئي شاخ وہاں اسلامی حکومت کے قیام اور جہاد کے پرچم کو لے کر آگے بڑھے گي۔ القاعدہ کی یہ ویڈیو جاری ہونے کے بعد ہندوستان کے مرکزی وزیر داخلہ راج ناتھ سنگھ نے جمعرات کو دہلی میں اعلی سطحی اجلاس طلب کیا اور حالات کا جائزہ لیتے ہوئے اس کی اطلاع وزیر اعظم نریندر مودی کودی۔اطلاعات کے مطابق راج ناتھ سنگھ نے القاعدہ کے ذریعہ تشکیل دی گئی اس کی شاخ کے بارے میں تحقیقات کا کام خفیہ ایجنسی آئي بی کو سونپ دیا ہے۔راج ناتھ سنگھ کا کہنا تھا کہ القاعدہ کی ویڈیو سے متعلق رپورٹ وزیراعظم کو سونپ دی گئي ہے اور یہ بھی بتایا گيا ہے کہ اس سلسلے میں کیا اقدامات کئے گئے ہیں۔