کرونا وائرس کے باعث سعودی وزیر صحت برطرف

سعودی حکومت نے کرونا وائرس کے پھیلنے سے ہلاکتوں کی بڑھتی ہوئی تعداد کے باعث وزیر صحت عبداللہ الربیعہ کو عہدے سے برطرف کردیا ہے۔ العالم چینل کی رپورٹ کے مطابق سعودی فرمانروا عبد اللہ بن عبد العزیز نے ایک حکم نامے ميں کرونا وائرس کے پھیلنے سے ہلاکتوں کی بڑھتی تعداد کے باعث وزیر صحت عبداللہ الربیعہ کو ان کے عہدے سے برطرف کرکے وزیر محنت عادل فقیہ کو اس وزارت کا سرپرست مقرر کیا ہے ۔اطلاعات کے مطابق کرونا وائرس کے باعث جدہ اور ریاض میں مزید دو شہری ہلاک ہوگئے جبکہ ستمبر 2012 میں سعودی عرب میں پھیلنے والے وائرس کے باعث اب تک مجموعی طور پر ہلاکتوں کی تعداد81 ہوگئی ہے ۔ سعودی وزارت صحت کے مطابق کرونا وائرس کے مزید 17 نئے کیسز رپورٹ ہوئے ہیں جبکہ ملک بھر میں وائرس سے متاثرہ مریضوں کی تعداد 250 سے تجاوز کرگئی ہے ۔