سعودی عرب کا ایران کے ساتھ انسداد منشیات تعاون بڑھانے کا اعلان

شیعیت نیوز: سعودی عرب نے اسلامی جمہوری ایران کے ساتھ انسداد منشیات کے شعبے میں باہمی تعاون کو فروغ دینے میں دلچسپی کا اظہار کیا ہے۔

تفصیلات کے مطابق تہران میں سعودی سفارت خانے کے دفتر برائے انسداد منشیات کے سربراہ سعید محمد الوداعی نے ایران کے انسداد منشیات ہیڈکوارٹر کے بین الاقوامی امور کے ڈائریکٹر محمد نریمانی سے ملاقات کی۔

اس موقع پر الوداعی نے کہا کہ دونوں برادر ممالک کے درمیان منشیات کے خلاف جنگ میں قریبی تعلقات کو فروغ دیا جانا چاہیے۔ منشیات کی اسمگلنگ ایک بین الاقوامی مسئلہ ہے جو سرحدوں اور براعظموں سے ماورا ہے، اور اسی لیے ممالک کے درمیان مشترکہ کوششیں ناگزیر ہیں۔

انہوں نے کہا کہ اسلام میں منشیات کی اسمگلنگ حرام اور جرم شمار ہوتی ہے، اور ایران و سعودی عرب جیسے اسلامی ممالک کو چاہیے کہ وہ تمام دستیاب وسائل کے ساتھ اس ناسور کا مقابلہ کریں۔

یہ بھی پڑھیں: ایران و روس کی مشترکہ بحری مشق، فرضی جہاز پر آگ بجھانے کی کارروائی مکمل

الوداعی نے بتایا کہ سعودی عرب میں ضبط کی جانے والی منشیات کا ۵۰ فیصد حصہ پڑوسی ممالک سے تعاون کے ذریعے سامنے آیا ہے۔ انہوں نے دونوں ممالک کے مابین موجود سیکیورٹی معاہدے میں منشیات کے خلاف تعاون کی شق کو دوبارہ فعال کرنے پر خوشی کا اظہار کیا اور کہا کہ اس سمت میں عملی اقدامات ضروری ہیں۔

انہوں نے یہ بھی اعلان کیا کہ ایران میں سعودی سفارتخانے کا انسداد منشیات دفتر دوبارہ فعال کردیا گیا ہے اور توقع ظاہر کی کہ ایران کے ساتھ تعاون صرف معلومات کے تبادلے تک محدود نہ رہے بلکہ افرادی قوت کی تربیت، تجربات کا تبادلہ اور دیگر میدانوں تک وسعت اختیار کرے۔