آل خلیفہ کی ہٹ دھرمی، عوام بے روزگار

بحرین کی جمعیت وفاق ملی نے کہا ہے کہ حکومت کی ہٹ دھرمی پر مبنی پالیسیاں ہی اس ملک کے عوام کے بے روزگار ہونے کا سبب ہیں۔ منامہ ریڈیو کی ویب سائٹ نے بحرین کی جمعیت وفاق ملی کے حوالے سے لکھا ہےکہ آل خلیفہ حکومت

نے نیا تعلیمی سال شروع ہونے کے ساتھ ہی سینکڑوں غیر ملکی باشندوں کو بحرین میں لاکر انہیں وزارت تعلیم میں ملازمت دی ہے۔ بحرین کی جمعیت وفاق ملی کے بیان میں کہا گيا ہے کہ غیر ملکی باشندے، ایسے حالات میں سیاسی محرکات کے ساتھ بحرین کی وزارت تعلیم میں ملازمت کے لئے لائے جارہے ہيں کہ بحرین کی یونیورسٹیوں کے ہزاروں فارغ التحصیل جوان، بے روزگار ہیں۔ بحرین کی جمعیت وفاق ملی کے بیان میں کہا گيا ہے کہ بحرین کے بے روزگار افراد کو اغیار سے زیادہ سرکاری اداروں میں ملازمت کا حق حاصل ہے لیکن آل خلیفہ حکومت اپنی انتقامی پالیسیوں کے نفاذ کے لئے کسی بھی غیر قانونی اقدام سے دستبردار نہیں ہورہی ہے۔ اس بیان میں مزید کہا گيا ہے کہ بحرین کے عوام کوایک ایسی حکومت کی ضرورت ہے جو عوامی ہو اور بحرینی عوام کے حقوق کو پورا کرے۔