آل خلیفہ حکومت کے خاتمے کا مطالبہ

بحرین میں آل خلیفہ کے خلاف مظاہرے بدستور جاری ہیں۔

ملت بحرین نے منامہ کے مضافات میں واقع سنابس علاقے میں احتجاجی مظاہرے کرکے آل خلیفہ کی حکومت کے خاتمے کا مطالبہ کیا۔ مظاہرین نے سیاسی قیدیوں کی رہائي کے نعرے لگائے۔ قابل ذکر ہے کہ عید الفطرکے دن بحرینی کارندوں کے تشدد میں ایک چودہ سالہ جوان شہید ہوگیا تھا ۔

ادھر بحرین کے ایک انقلابی رہنما محمد جاسم الدرازی نے نہتے عوام کے خلاف آل خلیفہ کے مجرمانہ اقدامات کی طرف اشارہ کرتے ہوئے کہا کہ داخلی اور بیرونی سازشوں کے باوجود ملت بحرین اپنے حقوق حاصل ہونے تک استقامت کرتی رہے گی اور اسکی تحریک جاری رہے گی۔ انہوں نے کہاکہ ملت بحرین چاہتی ہے کہ ایسی حکومت برسراقتدار آئے جو امتیاز و تعصب سے کام نہ لے ۔ انہوں نے ملت بحرین پرجاری تشدد پر عالمی برادری ، اقوام متحدہ اور عرب لیگ کی خاموشی کی مذمت کی۔