الجزائر میں انیس سال سے جاری ایمرجنسی خاتمے کے قریب؟

مشرق وسطی کے ممالک میں عوامی بیداری کی لہر پیدا ہونے کے بعد الجزائر کے حکام نے اعلان کیا ہے کہ آئندہ دنوں کے دوران ملک میں انیس سال سے نافذ ایمرجنسی ختم کر دی جائے گی۔ الجزائر کے وزیر خارجہ مراد مدلسی نے ایک بیان میں اس سلسلے میں کہا ہے کہ عنقریب ملک میں نافذ ایمرجنسی کے خاتمے کا اعلان کر دیا جائے گا۔ الجزائر کے صدر عبدالعزیز بوتفلیقہ نے بھی حال ہی میں کہا تھا کہ ملک میں نافذ ایمرجنسی ختم کر دی  جائے گي۔ الجزائر میں انیس سو بانوے میں دہشت گرد گروہوں کا مقابلہ کرنے کے بہانے ایمرجنسی نافذ کی گئی تھی۔ جس پر الجزائر کے سیاسی گروہوں نے کئی بار تنقید کی تھی۔ لیکن اس وقت کہ جب مشرق وسطی اور شمالی افریقہ میں حالات خاص رخ اختیار کر چکے ہیں، الجزائر نے بھی عوامی احتجاج کے ڈر سے بعض عوامی مطالبوں کو پورا کرنے کی کوشش کی ہے۔ الجزائر کے صدر عبدالعزیز بوتفلیقہ نے باضابطہ طور پر وزیراعظم احمد او یحیی سے کہا ہے کہ وہ دہشت گردی کے خلاف جدوجہد کو جاری رکھتے ہوئے مستقبل قریب میں ایمرجنسی کے خاتمے کے لیے ضروری اقدامات انجام دیں۔

یہ مطالبہ ایک ایسے وقت میں کیا گيا ہے کہ جب گزشتہ دنوں کے دوران الجزائر میں عوام نے حکومت کی پالیسیوں کے خلاف احتجاجی مظاہرے کیے ہیں۔ تبدیلی اور جمہوریت کے لیے قومی ہم آہنگی گروپ نے اعلان کیا ہے کہ وہ ہر ہفتے کے روز دارالحکومت الجزیرہ میں عوامی مظاہرے کیے جائیں گے۔ گزشتہ ہفتے کے روز بھی دارالحکومت میں احتجاجی مظاہرے کیے گئے تھے جن کے دوران سکیورٹی فورسز نے مظاہرین پر تشدد کیا تھا لیکن عوامی گروہوں اور جماعتوں نے اعلان کیا ہے کہ ان کے مطالبات پورے ہونے تک حکومت کی پالیسیوں کے خلاف تحریک جاری رہے گي۔

مسلمہ بات یہ ہے کہ موجودہ دور میں علاقے کی عرب قوموں کے درمیان بیداری کی لہر پیدا ہو گئی ہے۔ حکمرانوں کے خلاف تحریک تیونس سے شروع ہوئی اور اس وقت یہ علاقے کے عرب ملکوں میں پھیل گئی ہے۔ شمالی افریقہ کے ملکوں میں گزشتہ ایک ماہ کے دوران جو کچھ ہوا ہے وہ عالمی برادری کی توجہ کا مرکز بن گيا ہے۔ دنیا والے اب پوچھ رہے ہیں کہ زین العابدین بن علی اور حسنی مبارک کے بعد اب کس کی باری ہے؟

اگرچہ الجزائر کی صورت حال شمالی افریقہ کے بعض دیگر ملکوں سے کہ جو جابر حکمرانوں کے تسلط میں تھے، کافی مختلف ہے ، اور بوتفلیقہ نے گزشتہ برسوں کے دوران بعض اصلاحات انجام دے کر ملک میں جزوی امن و امان قائم کیا لیکن تقریبا دو دہائیوں سے جاری ایمرجنسی ان کا ایک کمزور پہلو ہے۔ اور یہی چیز اب عوامی تحریک کے لیے ایک چنگاری بن گئی ہے کہ جو شاید پورے الجزائر کو اپنی لپیٹ میں لے لے۔ لہذا الجزائر کے حکام نے معاشرے کی حساسیت کو دیکھتے ہوئے آئندہ دنوں میں ایمرجنسی کے خاتمے کا وعدہ کیا ہے تاکہ شاید وہ داخلی سطح پر سلگنے والی عوامی احتجاج کی آگ کو بجھا سکیں۔