عراق
داعش تکفیری گروہ کے وحشیانہ جرائم چار سو اسی شیعہ شہید
عراق میں انسانی حقوق کے سرگرم عمل کارکنوں نے اعلان کیا ہے کہ داعش تکفیری دہشتگردوں نے شمالی عراق کے صوبے نینوا کی ایک جیل کو اپنے وحشیانہ حملے کا نشانہ بناتے ہوئے چار سو اسّی شیعہ مسلمانوں کا قتل عام کردیا۔صوت العراق نیوز ایجنسی کی رپورٹ کے مطابق جنوبی عراق کے صوبے بصرہ کے انسانی حقوق کے مرکز نے اعلان کیا ہے کہ بدوش جیل میں داعش دہشتگردوں نے صرف شیعہ ہونے کی بناء پر ان افراد کو تہ تیغ کیا ہے۔انسانی حقوق کے اس مرکز نے داعش تکفیری دہشتگردوں کے اس غیر انسانی اقدام کے خلاف عالمی برادری کی جانب سے سخت ردعمل کا اظہار کئے جانے کی ضرورت پر زور دیا ہے۔واضح رہے کہ بدوش جیل، صوبے نینوا میں موصل کے قریب واقع ہے جس پر داعش دہشتگردوں نے قبضہ کرلیا تھا۔ ان دہشتگردوں نے بدوش جیل پر حملہ کرکے وہاں صرف شیعہ مسلمانوں کا بہیمانہ قتل عام کیا۔