مکہ معاہدے کے تحت پاکستان، ترکیہ اور سعودی عرب کا اہم اجلاس، اعلیٰ سطحی پاکستانی وفد ریاض روانہ

شیعیت نیوز : مکہ معاہدے کے تحت قائم سیاسی و دفاعی کمیٹی کا ایک اہم اجلاس سعودی دارالحکومت ریاض میں منعقد ہونے جا رہا ہے، جس میں رکن ممالک پاکستان، ترکیہ اور سعودی عرب کے اعلیٰ حکام شرکت کریں گے۔ اس اہم دفاعی و سیاسی اجلاس میں شرکت کے لیے پاکستان کی جانب سے نائب وزیراعظم، وزیر دفاع اور چیف آف آرمی اسٹاف پر مشتمل ایک اعلیٰ سطحی وفد سعودی عرب کا دورہ کر رہا ہے۔ پاکستانی وزارت خارجہ نے باضابطہ طور پر اس اعلیٰ سطحی وفد کی سعودی عرب روانگی کا اعلان کیا ہے۔

یہ بھی پڑھیں : پاک ایران تعلقات کی مضبوطی: گورنر اصفہان کی پاکستانی سفیر سے ملاقات، ثقافتی و تجارتی تعاون بڑھانے پر زور

پاکستانی وزارت خارجہ کے مطابق، ریاض میں ہونے والے اس سہ فریقی اجلاس میں خطے کی تازہ ترین سکیورٹی صورتحال اور مکہ معاہدے کے تحت جاری باہمی تعاون کے حوالے سے تفصیلی تبادلہ خیال کیا جائے گا۔ اس سے قبل پاکستان کے وزیر خارجہ بھی یہ اعلان کر چکے ہیں کہ مذکورہ کمیٹی کا یہ ہنگامی اجلاس بالخصوص یمن کی موجودہ صورتحال اور سعودی عرب کے خلاف یمنی مسلح افواج (انصار اللہ) کی دفاعی کارروائیوں پر غور کے لیے طلب کیا گیا ہے۔

واضح رہے کہ یہ اجلاس ایک ایسے وقت میں منعقد ہو رہا ہے جب یمن کے رہائشی اور شہری علاقوں پر متجاوز سعودی رجیم کے وحشیانہ فضائی حملے بدستور جاری ہیں، جن کے نتیجے میں مسلسل بے گناہ شہریوں کا خون بہایا جا رہا ہے اور یمن میں سنگین انسانی بحران جنم لے چکا ہے۔