امریکہ کی جانب سے قطری ثالث کے ذریعے اہم تجویز موصول ہوئی ہے، علاء الدین بروجردی

شیعیت نیوز : ایرانی پارلیمنٹ (مجلس) کی قومی سلامتی اور خارجہ پالیسی کمیٹی کے سینئر رکن علاء الدین بروجردی نے انکشاف کیا ہے کہ امریکہ کی جانب سے قطری ثالث کے ذریعے ایک اہم تجویز تہران کو موصول ہوئی ہے۔ صحافیوں سے گفتگو کرتے ہوئے انہوں نے واضح کیا کہ آبنائے ہرمز کے حوالے سے اسلامی جمہوریہ ایران اپنی اصولی اور اسٹریٹجک پالیسی پر مضبوطی سے قائم ہے اور اس مؤقف میں کوئی تبدیلی نہیں آئے گی۔

ڈونلڈ ٹرمپ کے حالیہ بیانات پر ردعمل دیتے ہوئے انہوں نے کہا کہ ٹرمپ ہمیشہ اس طرح کی اشتعال انگیز بیان بازی کرتے رہتے ہیں اور امریکی صدر کی زبان میں پائی جانے والی یہ غیر معمولی اور غیر متوازن باتیں اب ہمارے لیے کوئی نئی بات نہیں رہیں، ہم اس کے عادی ہو چکے ہیں۔

یہ بھی پڑھیں : ایرانی فلکیات و فلکی طبیعیات ٹیم کی عالمی چیمپئن شپ میں ہیٹ ٹرک، اسپیکر قالیباف کی مبارکباد

انہوں نے عوام کو اطمینان دلاتے ہوئے کہا کہ اس وقت تشویش کی کوئی وجہ نہیں، کیونکہ جب تک امریکی اپنے صدارتی انتخابات کے عمل میں مصروف ہیں، وہ اصولی طور پر کسی سخت فوجی یا عملی تصادم کے مرحلے میں داخل نہیں ہوں گے۔ تاہم انہوں نے خبردار کیا کہ اگر امریکہ نے کوئی فوجی حماقت کی بھی تو ایرانی مسلح افواج اور عوام اس کا منہ توڑ جواب دینے کے لیے مکمل طور پر تیار ہیں۔

قطری ثالثی کے حوالے سے بروجردی نے تصدیق کی کہ امریکی تجویز قطر کے ذریعے ایران تک پہنچائی گئی ہے، تاہم ان کے پاس فی الوقت اس کی مزید تفصیلات موجود نہیں ہیں۔ انہوں نے بتایا کہ اس اہم معاملے پر مزید معلومات اور تفصیلات جاننے کے لیے آج سہ پہر وزیر خارجہ کے ساتھ ایک اہم اجلاس منعقد ہوگا جس میں اس امریکی تجویز کا باریک بینی سے جائزہ لیا جائے گا۔