ذلت قبول کرنے والا ہی ظلم برداشت کرتا ہے: عزت و استقامت کے ساتھ زندگی گزاریں، آیت اللہ جوادی آملی

شیعیت نیوز : مرجع تشیع آیت اللہ العظمیٰ جوادی آملی نے قم کی مسجد اعظم میں اپنے ہفتہ وار درسِ اخلاق میں امیرالمؤمنین حضرت علی علیہ السلام کے نہج البلاغہ میں موجود ارشادات کی روشنی میں توحید اور اس کے انفرادی و اجتماعی اثرات پر تفصیلی روشنی ڈالی۔ انہوں نے واضح کیا کہ موحد وہ شخص نہیں جو صرف زبان سے اللہ تعالیٰ کی وحدانیت کا اقرار کرے، بلکہ اس کے اعمال اور زندگی کے تمام معاملات میں توحید کے آثار نمایاں ہونے چاہئیں۔ انسان کو چاہیے کہ وہ اپنی زندگی کے تمام شعبوں کو «لا حول ولا قوة إلا بالله» کے سائے میں دیکھے۔

یہ بھی پڑھیں : فلسطین و لبنان پر اسرائیلی جارحیت ناقابل قبول، شیعہ سنی اتحاد وقت کی اہم ضرورت ہے، علامہ مقصود ڈومکی

آیت اللہ جوادی آملی نے علم پر عمل کی اہمیت بیان کرتے ہوئے امیرالمؤمنینؑ کا فرمان نقل کیا: «لَا تَجْعَلُوا عِلْمَکُمْ جَهْلًا، وَیَقِینَکُمْ شَکّاً» (اپنے علم کو جہالت اور یقین کو شک نہ بناؤ)۔ انہوں نے حوزوی طلبہ اور علما کو نصیحت کی کہ وہ اپنے علمی سرمائے کو ضائع نہ کریں اور اپنی تحریر و تقریر میں احتیاط برتیں کیونکہ یہ ان کی علمی شخصیت کی عکاس ہوتی ہے۔ سماجی تعلقات پر زور دیتے ہوئے انہوں نے کہا کہ ضرورت مند کے سامنے عزت کے ساتھ پیش آنا چاہیے کیونکہ «المسکین رسول الله» (ضرورت مند گویا خدا کا فرستادہ ہے)۔ اس کے علاوہ انہوں نے رزقِ حلال کے حوالے سے مایوسی سے بچنے کی بھی تلقین کی۔

ظلم کے مقابلے میں عزت و استقامت پر زور دیتے ہوئے انہوں نے امیرالمؤمنینؑ کا فرمان «لَا یَمْنَعُ الضَّیْمَ الذَّلِیلُ» نقل کیا اور کہا کہ صرف ذلت قبول کرنے والا ہی ظلم برداشت کرتا ہے۔ انہوں نے تاکید کی کہ ستم پذیر نہ بنیں اور شجاعت کے ساتھ مردانہ وار زندگی گزاریں۔ آخر میں انہوں نے عوام کی استقامت اور قربانیوں کو قوم کی عظمت کا مظہر قرار دیا اور شہداء، مرحومین اور حاضرین کے لیے خصوصی دعا کی۔