تشیع کی تاریخ قربانیوں سے عبارت ہے، شہید خورشید انور ایڈووکیٹ کی برسی پر علامہ ساجد علی نقوی کا خراجِ عقیدت

شیعیت نیوز : قائد ملت جعفریہ پاکستان علامہ سید ساجد علی نقوی نے 28 ستمبر 1999ء کو ڈیرہ اسماعیل خان کے مایہ ناز سپوت، ممتاز قانون دان اور معروف سیاسی و سماجی شخصیت شہید خورشید انور ایڈووکیٹ اور ان کی دختر کی 28ویں برسی کے موقع پر جاری کردہ اپنے خصوصی پیغام میں انہیں زبردست خراجِ عقیدت پیش کیا ہے۔ اپنے پیغام میں انہوں نے کہا کہ شہید خورشید انور ایڈووکیٹ اور ان کی لختِ جگر کی المناک شہادت ملت کے لیے ایک بہت بڑا اور ناقابلِ فراموش سانحہ تھا۔

یہ بھی پڑھیں : انجمن حسینیہ خواجگان نارووالی لاہور کے زیرِ اہتمام جدید حسینیہ آڈیٹوریم کا شاندار افتتاح

قائد ملت جعفریہ نے اس بات پر زور دیا کہ ایک معتدل مزاج، مخلص اور محب وطن رہنما کا اس سفاکی سے ناحق خون بہایا جانا انتہائی افسوسناک ہے، جس کے محرکات کا بغور جائزہ لینا اور قاتلوں کو بے نقاب کرنا اربابِ اقتدار اور ریاستی اداروں کی بنیادی ذمہ داری ہے۔ انہوں نے واضح کیا کہ ملت تشیع کی پوری تاریخ عظیم قربانیوں سے عبارت ہے اور اس ملت نے ہمیشہ حق، عدل، قیامِ امن اور اصولوں کی سربلندی کی خاطر بے دریغ قربانیاں پیش کی ہیں۔

شہید خورشید انور ایڈووکیٹ کی گراں قدر قومی و ملی خدمات کو خراجِ تحسین پیش کرتے ہوئے انہوں نے کہا کہ مرحوم کی بے لوث خدمات کو ہمیشہ قدر و احترام کی نگاہ سے دیکھا جائے گا۔ علامہ ساجد علی نقوی نے شہید اور ان کی دختر کے درجات کی بلندی کے لیے خصوصی دعا کی اور سوگوار خانوادہ کے ساتھ دلی ہمدردی و تعزیت کا اظہار کیا۔