آیت اللہ العظمیٰ سید موسیٰ شبیری زنجانی کے انتقال پر حوزات علمیہ میں رواں ہفتے تعطیل کا اعلان

شیعیت نیوز : حوزات علمیہ کے سربراہ آیت اللہ علی رضا اعرافی نے بلند پایہ مرجع تقلید آیت اللہ العظمیٰ سید موسیٰ شبیری زنجانی کے انتقال پر گہرے دکھ اور افسوس کا اظہار کرتے ہوئے خصوصی تعزیتی پیغام جاری کیا ہے۔ اپنے پیغام میں انہوں نے کہا کہ اس عظیم استاد اور فقیہ نے اپنی تقریباً ایک صدی پر محیط بابرکت زندگی تعلیم و تدریس، تحقیق، شاگردوں کی تربیت اور عوام و اہل علم کی رہنمائی میں گزاری ہے۔ ان کی گراں قدر علمی خدمات سے حوزہ علمیہ قم اور دیگر حوزات کو نمایاں ترقی ملی۔

آیت اللہ علی رضا اعرافی نے ولی عصر امام مہدی (عج)، مراجع عظام، رہبر معظم اور دنیا بھر کے مسلمانوں کی خدمت میں تسلیت پیش کرتے ہوئے اعلان کیا کہ مراجع عظام اور حوزات علمیہ کی اعلیٰ کونسل کی منظوری سے رواں ہفتے کے اختتام تک حوزات علمیہ کے تمام دروس تعطیل رہیں گے۔ اس تعطیل کا مقصد مرجعیت کی اس عظیم شخصیت کو خراج عقیدت پیش کرنا اور تشییع جنازہ، تدفین اور مجالسِ فاتحہ میں شرکت کی سہولت فراہم کرنا ہے۔

یہ بھی پڑھیں : اپنے حقوق کے لیے آواز اٹھانا ہمارا آئینی حق ہے، پرامن جلسوں سے کیوں ڈرتے ہیں، سینیٹر علامہ راجہ ناصر عباس جعفری

تعزیتی پیغام میں مزید کہا گیا کہ یہ عظیم فقیہ ایک بلند علمی خاندان میں پیدا ہوئے اور انہوں نے آیت اللہ العظمیٰ بروجردی اور آیت اللہ محقق داماد جیسے بزرگ اساتذہ سے کسبِ فیض کیا۔ وہ علم و دین کے ایک مضبوط ستون کی حیثیت سے فقہی تحقیقات، علم رجال اور تاریخ کے باریک نکات پر گہری نظر رکھتے تھے۔ مدرسہ فیضیہ اور حرم مطہر حضرت معصومہ (س) میں طویل عرصے تک نماز جماعت کی امامت کے ذریعے وہ عوام کی دینی رہنمائی کا فریضہ بھی بااحسن انجام دیتے رہے۔

آیت اللہ اعرافی نے واضح کیا کہ اسلامی انقلاب کی جدوجہد کے دوران امام خمینی (رہ) کی قیادت میں اور اس کے بعد رہبر معظم کے دور میں بھی وہ انقلابِ اسلامی کے سچے خیرخواہ اور حوزات علمیہ کے ہمدرد رہنما رہے۔ ان کا اخلاق، زہد و سادگی اور پاکیزہ زندگی طلبہ اور اساتذہ کے لیے ہمیشہ مشعلِ راہ رہے گی۔ حوزات علمیہ اور عوام ان کے علمی ورثے کی حفاظت کرتے ہوئے مکتبِ اہلِ بیت (ع) کے راستے پر ثابت قدم رہیں گے۔