امام حسن عسکریؑ کی شہادت؛ عصرِ غیبت کی تیاری کا حسین ترین باب

شیعیت نیوز : آج امام حسن عسکری علیہ السلام کی شہادت کا دن ہے۔ امام حسن عسکریؑ کی امامت کا دور تاریخ تشیع کے حساس ترین ادوار میں شمار ہوتا ہے۔ آپؑ نے ایسے حالات میں امامت کی ذمہ داری سنبھالی جب عباسی حکومت کی جانب سے آپؑ پر سخت نگرانی اور دباؤ تھا۔ اس کے باوجود آپؑ نے اعتقادی شبہات کا جواب دینے، شیعوں سے رابطہ برقرار رکھنے، وکالت کے نظام کو مضبوط بنانے اور مقام امامت کی وضاحت کے ساتھ ساتھ شیعہ معاشرے کو حضرت ولی عصرؑ کی غیبت کے دور میں داخل ہونے کے لیے تیار کیا۔

اس موقع پر حوزہ علمیہ کے استاد حجۃ الاسلام حسنلو نے مہر نیوز سے گفتگو میں امام حسن عسکریؑ کے دور امامت کی اہم خصوصیات، عباسی حکومت کے دباؤ، شیعوں سے رابطے کے طریقوں، نظام وکالت کے کردار اور عصر غیبت کے لیے تیاری کے بارے میں تفصیل سے روشنی ڈالی۔

امام حسن عسکریؑ کے دور امامت کی اہم خصوصیات

حجۃ الاسلام حسنلو نے کہا کہ امام حسن عسکریؑ کا دور امامت تاریخِ تشیع کے حساس ترین اور دشوار ترین ادوار میں شمار ہوتا ہے۔ آپؑ نے اپنے بزرگوار والد امام ہادیؑ کی شہادت کے بعد 254 ہجری قمری میں منصب امامت سنبھالا اور 260 ہجری تک تقریباً چھ برس شیعہ معاشرے کی رہنمائی فرمائی۔ اگرچہ یہ مدت مختصر تھی، لیکن اس کا مطلب ہرگز یہ نہیں کہ اس دور کے اثرات محدود تھے؛ بلکہ امامؑ نے اسی مختصر عرصے میں شیعہ عقائد کی بنیادوں کو مستحکم کرنے اور اپنے پیروکاروں کو عصر غیبت کے لیے تیار کرنے میں فیصلہ کن کردار ادا کیا۔

اس دور کی نمایاں خصوصیت عباسی حکومت کی جانب سے شدید دباؤ اور مسلسل نگرانی تھی۔ امام حسن عسکریؑ کو عباسی خلافت کے سیاسی اور فوجی مرکز سامرہ میں رہنے پر مجبور کیا گیا تھا۔ عسکری کا لقب بھی اسی فوجی علاقے عسکر میں آپؑ کی جبری رہائش کی نسبت سے مشہور ہوا۔ ایسے ماحول میں امامؑ کی موجودگی اس بات کو ظاہر کرتی ہے کہ عباسی حکومت آپؑ کی سرگرمیوں اور شیعوں کے ساتھ آپؑ کے روابط پر گہری نظر رکھتی تھی۔

عباسی حکومت کی نگرانی اور دباؤ کے اسباب

حجۃ الاسلام حسنلو نے عباسی حکومت کے شدید نگرانی کے اسباب بیان کرتے ہوئے کہا کہ عباسی حکومت امام حسن عسکریؑ کے سماجی اور روحانی مقام سے بخوبی واقف تھی۔ اگرچہ عباسی خلفا بظاہر سیاسی اور فوجی طاقت رکھتے تھے، لیکن مسلمانوں، بالخصوص شیعوں کے ایک بڑے طبقے میں حقیقی دینی مقبولیت اور اعتماد خاندانِ رسولؐ کو حاصل تھا۔ عباسیوں کی حساسیت کی ایک اہم وجہ وہ متعدد روایات تھیں جن میں امام حسن عسکریؑ کی نسل سے موعود مہدیؑ کی ولادت کی خبر دی گئی تھی۔ عباسی خلفا کو خوف تھا کہ امام عسکریؑ کے ہاں پیدا ہونے والا فرزند ظالم حکومتوں کی حیثیت کو چیلنج کرے گا اور عدل و انصاف کی تحریکوں کا محور بن جائے گا۔

اسی وجہ سے امام حسن عسکریؑ کو سامرہ میں سخت نگرانی میں رکھا گیا اور عباسی حکومت ان کے شیعوں اور ساتھیوں کی آمد و رفت پر بھی نظر رکھتی تھی۔ کبھی امامؑ کو دربار یا حکومتی مراکز میں طلب کیا جاتا تاکہ ان کے معمولات اور روابط کی براہِ راست نگرانی کی جا سکے۔ یہ نگرانی صرف سکیورٹی کے نقطۂ نظر سے نہیں تھی بلکہ امامؑ کی دینی مرجعیت اور سماجی اثر و رسوخ کو محدود کرنا بھی اس کا ایک اہم مقصد تھا۔

یہ بھی پڑھیں: شہادت امام عسکریؑ عصرِ غیبت کا آغاز اور عالمی عدل کے ظہور کا پیش خیمہ ہے، آیت اللہ دری نجف آبادی

سامرہ کی گھٹن میں رابطے کی حکمت عملی

حجۃ الاسلام حسنلو نے واضح کیا کہ امام حسن عسکریؑ ایسے حالات میں زندگی گزار رہے تھے جہاں لوگوں کے لیے آپؑ سے آزادانہ ملاقات اور رابطہ ممکن نہیں تھا۔ عباسی اہلکار امامؑ کے گھر، آمد و رفت اور ملاقات کرنے والوں کی نگرانی کرتے تھے۔ چنانچہ امامؑ نے شیعوں کی جان کی حفاظت اور معاشرے کی مسلسل رہنمائی کے لیے ایک حکیمانہ، محتاط اور منظم طریقۂ کار اختیار کیا۔

امامؑ کے رابطے کے اہم ترین ذرائع میں خط و کتابت شامل تھی۔ آپؑ خطوط کے ذریعے شیعوں کے شرعی اور اعتقادی سوالات کے جوابات دیتے، اپنے نمائندوں کی رہنمائی فرماتے اور ضرورت کے مطابق معاشرے کے اہم مسائل کی وضاحت کرتے تھے۔ یہ خطوط صرف علمی اور فقہی رہنمائی کا ذریعہ نہیں تھے بلکہ مختلف شہروں میں موجود شیعہ معاشرے کے ساتھ امامؑ کے مسلسل رابطے کی علامت بھی تھے۔

نظام وکالت کا کردار اور اہمیت

حجۃ الاسلام حسنلو نے نظام وکالت کو امام حسن عسکریؑ کے دور کی اہم ترین خصوصیات میں شمار کرتے ہوئے کہا کہ یہ نظام دراصل امامان شیعہ کے قابل اعتماد نمائندوں پر مشتمل ایک منظم سلسلہ تھا جو مختلف شہروں اور علاقوں میں امام اور شیعوں کے درمیان رابطے کی ذمہ داری انجام دیتا تھا۔ اگرچہ اس نظام کی بنیاد سابقہ ائمہؑ کے ادوار میں پڑ چکی تھی، لیکن امام حسن عسکریؑ کے زمانے میں سیاسی دباؤ اور رابطے کی سخت پابندیوں کے باعث اس کی اہمیت مزید بڑھ گئی۔

امامؑ کے وکلا مختلف ذمہ داریاں انجام دیتے تھے۔ وہ لوگوں کے دینی اور اعتقادی سوالات وصول کرکے ان کے جوابات امامؑ تک پہنچاتے تھے۔ اسی طرح شیعوں کے شرعی اموال، نذورات اور مالی عطیات جمع کرکے امامؑ کی ہدایات کے مطابق انہیں مناسب مقاصد میں استعمال کیا جاتا تھا۔ نظام وکالت میں سب سے اہم مسئلہ قابل اعتماد اور اہل افراد کا انتخاب تھا۔ امام حسن عسکریؑ قابل اعتماد افراد کی شناخت اور تائید کے ذریعے شیعوں کو ان کی طرف رجوع کرنے کی ہدایت فرماتے اور جھوٹے دعوے داروں سے ہوشیار رہنے کی تاکید کرتے تھے۔

عصر غیبت کے لیے فکری و عملی تیاری

حجۃ الاسلام حسنلو نے عصر غیبت کے لیے تیاری کو امام حسن عسکریؑ کی اہم ترین ذمہ داریوں میں شمار کیا۔ انہوں نے کہا کہ شیعہ معاشرہ دو صدیوں سے زیادہ عرصے تک اپنے ائمہؑ کو لوگوں کے درمیان دیکھنے اور براہِ راست ان سے رجوع کرنے کا عادی تھا۔ لیکن حضرت مهدیؑ کی غیبت کا زمانہ قریب آنے کے ساتھ ضروری تھا کہ شیعوں کی ایسی تربیت کی جائے کہ امامؑ تک ظاہری اور براہِ راست رسائی نہ ہونے کی صورت میں وہ شک، حیرانی یا گمراہی کا شکار نہ ہوں۔

اس تیاری کا ایک طریقہ امامؑ کے عوام سے براہِ راست روابط کا بتدریج محدود ہونا تھا۔ نظام وکالت کو مضبوط کرنا امام حسن عسکریؑ کی ایک اور اہم حکمت عملی تھی۔ امامؑ نے مناسب مواقع پر اپنے فرزند حضرت مهدیؑ کو اپنے بعض قابل اعتماد اصحاب اور شیعوں کے سامنے بھی متعارف کرایا۔ اس زمانے کے سخت سکیورٹی حالات کے پیش نظر یہ تعارف محدود اور انتہائی محتاط انداز میں کیا گیا، کیونکہ عباسی حکومت امامؑ کے فرزند کی تلاش میں تھی۔

اعتقادی بنیادوں کو مضبوط کرنا بھی اس تیاری کا اہم حصہ تھا۔ امام حسن عسکریؑ نے شبہات کے جوابات، شیعوں کی تعلیم و تربیت اور امام کی معرفت کی اہمیت پر زور دے کر معاشرے کی فکری بنیادوں کو مستحکم کیا۔ آپؑ کی سیرت کا پیغام یہ تھا کہ ایک مؤمن کو مشکل حالات میں معرفت، صبر، معتبر دینی ذرائع سے رجوع اور جھوٹے دعوے داروں سے اجتناب کے ذریعے حق کے راستے پر قائم رہنا چاہیے۔

یہی وہ فکری اور عملی میراث تھی جس نے شیعہ معاشرے کو امام کی ظاہری عدم موجودگی کے دور میں بھی دینی راستہ برقرار رکھنے کے قابل بنایا اور عصر غیبت کے لیے ایک مضبوط اعتقادی و تنظیمی بنیاد فراہم کی۔