الجزیرہ کا تجزیہ: ایران نے امریکہ کو ناکام کر دیا، غلط اندازوں اور تکنیکی برتری نے فیصلہ کن کردار ادا کیا

شیعیت نیوز : الجزیرہ نے اپنی ایک تفصیلی رپورٹ میں ایران کے مقابلے میں امریکہ کی ناکامی کے اسباب کا جائزہ لیتے ہوئے کہا ہے کہ حالیہ جنگ میں امریکی غلطیوں اور ایران کی کامیابیوں کے پیچھے کئی اہم عوامل کارفرما رہے۔ رپورٹ کے مطابق پہلی بڑی وجہ یہ تھی کہ امریکی حکام نے ایران کے بارے میں بنیادی طور پر غلط اندازہ لگایا۔ ایران ایک قدیم تہذیب ہے جس کی تاریخ پانچ ہزار سال پر محیط ہے، اور اس کے عوام میں گہری ثقافت، قومی مزاحمت اور تاریخی وقار پایا جاتا ہے۔

الجزیرہ کے مطابق ایران نے امریکی دباؤ اور حملوں کے سامنے سر تسلیم خم نہیں کیا، خاص طور پر اس لیے کہ ایرانی عوام کو 1953 کی وہ امریکی مداخلت یاد ہے جس میں ایک منتخب جمہوری حکومت کا تختہ الٹ کر ایک طویل عرصے تک قائم رہنے والی بادشاہت قائم کی گئی تھی۔ رپورٹ میں دوسری وجہ ایران کی تکنیکی ترقی کو امریکہ کی جانب سے کم تر سمجھنے کو قرار دیا گیا۔

یہ بھی پڑھیں : ایران کی مصر کو دھمکی: باب المندب کے ذریعے سوئز کینال بند کر دیں گے

الجزیرہ کے مطابق ایران انجینئرنگ اور ریاضی کے میدان میں عالمی سطح پر نمایاں حیثیت رکھتا ہے اور اس نے جدید بیلسٹک میزائلوں اور ڈرونز پر مشتمل ایک مضبوط دفاعی ڈھانچہ قائم کر لیا ہے۔ تیسری وجہ کے طور پر رپورٹ میں کہا گیا کہ عسکری ٹیکنالوجی کا توازن ایران کے حق میں بدل چکا ہے۔

ایرانی بیلسٹک میزائلوں کی تیاری پر آنے والی لاگت امریکی دفاعی میزائلوں کے مقابلے میں انتہائی کم ہے۔ رپورٹ کے مطابق ایرانی ڈرون تقریباً 20 ہزار ڈالر میں تیار ہوتے ہیں جبکہ امریکی فضائی دفاعی نظام کے میزائلوں کی قیمت تقریباً 40 لاکھ ڈالر تک پہنچتی ہے۔ الجزیرہ نے نتیجہ اخذ کرتے ہوئے کہا کہ ممکنہ طور پر جنگ کا اختتام ایسی صورتحال پر ہوگا جو کسی حد تک سابقہ حالات سے ملتی جلتی ہوگی، لیکن تین نئی حقیقتوں کے ساتھ: پہلی یہ کہ ایران عملاً آبنائے ہرمز پر کنٹرول حاصل کر لے گا، دوسری یہ کہ ایران کی دفاعی اور جوابی صلاحیت مزید مضبوط ہو جائے گی، اور تیسری یہ کہ خلیج فارس میں امریکہ کی طویل مدتی فوجی موجودگی میں نمایاں کمی آئے گی۔