رہبر انقلاب، مکتبِ امام خمینیؒ کی بہترین تفسیر ہیں، آیت اللہ ناصر مکارم شیرازی

 شیعیت نیوز: آیت اللہ العظمیٰ ناصر مکارم شیرازی نے "مثلِ خمینیؒ” تربیتی کیمپ کے موقع پر اپنے خصوصی پیغام میں قرآن کریم کی روشنی میں اسلامی تربیتی اصولوں پر روشنی ڈالی اور رہبر معظم انقلاب اسلامی حضرت آیت اللہ العظمیٰ سید علی خامنہ ای کے بیانات کو مکتب امام خمینیؒ کی بہترین تفسیر و تشریح قرار دیا۔

آیت اللہ مکارم شیرازی نے پیغام کا آغاز کرتے ہوئے حالیہ مسلط کردہ جنگ کے شہداء، کمانڈروں، دانشوروں، مجاہدین اور مظلوم شہریوں کو خراج عقیدت پیش کیا۔ انہوں نے خداوند متعال سے ایران اور اسلامی انقلاب کے دشمنوں کی نابودی اور ذلت کی دعا کی۔

انہوں نے کہا کہ قرآن کریم مؤمنین کی تربیت کے لیے انبیاء کرام علیہم السلام اور اولیائے الٰہی کی سیرت کو نمونہ و اسوہ قرار دیتا ہے تاکہ انسان سعادت و نجات کی راہ پر گامزن ہو سکے۔ انہوں نے آیہ کریمہ کا حوالہ دیا:

"لَقَدْ كَانَ لَكُمْ أُسْوَةٌ حَسَنَةٌ فِي إِبْرَاهِيمَ وَالَّذِينَ مَعَهُ”
(ترجمہ: تمہارے لیے حضرت ابراہیمؑ اور ان کے ساتھیوں میں بہترین نمونہ ہے)

انہوں نے مزید کہا کہ موجودہ دور میں امام خمینیؒ ایک روشن اسوہ اور نمونہ عمل ہیں جن کی فکری، فقہی اور انقلابی خدمات رہتی دنیا تک یاد رکھی جائیں گی۔ ان کا فقہی فہم، قرآنی تفہیم، خلوص اور معاشرتی بصیرت نوجوان طلاب کے لیے مشعل راہ ہے۔

یہ بھی پڑھیں: آئی ایس او کے تحت شہر شہر دستخطی مہم!طلبہ کا رہبر معظم کے نام خط

انہوں نے زور دیا کہ امام خمینیؒ کی فکر و سیرت کو نوجوانوں تک پہنچانا وقت کی اہم ضرورت ہے تاکہ ان کے افکار میں کوئی تحریف یا انحراف نہ ہو۔ اس ضمن میں انہوں نے رہبر انقلاب اسلامی آیت اللہ العظمیٰ خامنہ ای کے بیانات کو مکتب خمینیؒ کی بہترین وضاحت قرار دیا۔

آیت اللہ مکارم شیرازی نے اس تربیتی کیمپ کی اہمیت پر روشنی ڈالتے ہوئے کہا کہ ایسے علمی و فکری پروگرام اسلامی معاشرے کے مستقبل ساز نوجوانوں کی تربیت کے لیے نہایت اہم اور مؤثر ہیں۔ ان کی قدر کرنا اور بھرپور استفادہ کرنا چاہیے۔

آخر میں انہوں نے کیمپ کے منتظمین اور شرکاء کا شکریہ ادا کیا اور بارگاہِ الٰہی میں دعا کی کہ خداوند متعال امام خمینیؒ کے درجات بلند فرمائے اور اسلامی انقلاب کے راستے میں گامزن افراد کو مزید توفیق عطا کرے۔

قم – آیت اللہ ناصر مکارم شیرازی