نشتر میڈیکل یونیورسٹی میں آئی ایس او کا 53 واں یومِ حسینؑ، علامہ سید شہنشاہ حسین نقوی کا خصوصی خطاب

شیعیت نیوز : آئی ایس او ملتان پاکستان کے تحت نشتر میڈیکل یونیورسٹی میں سالانہ 53 واں "یومِ حسین علیہ السّلام” کا انعقاد کیا گیا، جس میں طلباء و طالبات سمیت اساتذہ اور مہمان شخصیات نے بھرپور شرکت کی۔

کانفرنس میں معروف عالم دین علامہ سید شہنشاہ حسین نقوی، یونیورسٹی کی وائس چانسلر ڈاکٹر مہناز خاکوانی، ڈائریکٹر اسٹوڈنٹس افیئر ڈاکٹر سید احمر حسین، پرنسپل الائیڈ ہیلتھ سائنسز ڈاکٹر عبدالستار انجم، پرنسپل نرسنگ کالج محترمہ قمرالنسا، ہیڈ آف گائنی ڈیپارٹمنٹ ڈاکٹر سیدہ علی، ڈائریکٹر مینیجمنٹ ڈاکٹر عامر اسد، ڈاکٹر سجاد رضا، ڈاکٹر الطاف باقر اور ڈاکٹر علی احمد نقوی نے شرکت کی۔

حجۃ الاسلام والمسلمین علامہ سید شہنشاہ حسین نقوی نے قیامِ امام حسینؑ پر روشنی ڈالتے ہوئے کہا کہ اگر امام حسینؑ قیام نہ فرماتے تو اسلام کی اجتماعی شکل مسخ ہو جاتی۔ امامؑ اور ان کے اہل بیت و انصار کی شہادت نے اسلام کو نئی زندگی بخشی۔ اُنہوں نے کہا کہ آج کی غزہ، کربلا کی تصویر پیش کر رہی ہے، جس میں اسلامی دنیا سوائے ایران، حزب اللہ لبنان اور مقاومتی مزاحمت مصر کے، اپنی ذمہ داری ادا کرنے میں ناکام رہی ہے۔

یہ بھی پڑھیں : آیت اللہ بشیر نجفی کا اہلِ غزہ پر صہیونی مظالم پر اظہارِ غم و غصہ، عالمی خاموشی پر شدید تنقید

کانفرنس سے خطاب کرتے ہوئے وائس چانسلر پروفیسر ڈاکٹر مہناز خاکوانی نے کہا کہ کربلا ہمیں حریت و مقاومت کا درس دیتی ہے۔ یہ معرکہ ہمیں سکھاتا ہے کہ حالات کتنے ہی مشکل کیوں نہ ہوں، ظلم کے خلاف آواز بلند کرنا ہی اصل ایمان ہے۔ انہوں نے کہا کہ غزہ کے مظلوم عوام کی مزاحمت دراصل کربلا کے پیغام کا تسلسل ہے، اور مسلمانوں کو چاہیے کہ اس وقت حسینی کردار ادا کرتے ہوئے اہلِ غزہ کی بھرپور مدد کریں۔

کانفرنس میں نشتر یونیورسٹی کے طلبہ و طالبات کی کثیر تعداد نے شرکت کی۔ طلباء و طالبات نے منقبت، قصیدہ اور مرثیہ بھی پیش کیے، جس سے محفل کا ماحول انتہائی پر اثر ہو گیا۔