ایران کا امریکا کے یمن پر حملوں پر سخت ردعمل، اقوام متحدہ سے خاموشی توڑنے کا مطالبہ
ایرانی ترجمان کا او آئی سی اور اسلامی حکومتوں سے جارحیت روکنے کے لیے فوری اور ہمہ گیر اقدام کا مطالبہ
شیعیت نیوز : ارنا کے مطابق اسلامی جمہوریہ ایران کی وزارت خارجہ کے ترجمان اسماعیل بقائی نے کہا ہے کہ یمن پر امریکا کے فضائی حملے غیر قانونی اور بین الاقوامی قوانین نیز بنیادی اصول و ضوابط کی کھلی خلاف ورزی ہیں۔
انہوں نے کہا کہ یہ حملے مقبوضہ فلسطین میں نہتے فلسطینی عوام کی نسل کشی جاری رہنے اور خطے میں بدامنی بڑھنے کا سبب بنیں گے۔
یہ بھی پڑھیں : سید عباس عراقچی رہبر انقلاب کا خصوصی پیغام لے کر روس روانہ
اسماعیل بقائی نے یمن کے عوام کے ساتھ اسلامی جمہوریہ ایران کی یکجہتی کا اعلان کرتے ہوئے کہا کہ ہم صیہونی حکومت کی جارحیت اور وحشیانہ جرائم کے مقابلے میں انسانی فریضے کے طور پر مظلوم فلسطینی عوام کی حمایت جاری رکھیں گے۔
انہوں نے کہا کہ یمن کے خلاف امریکی حملے، بین الاقوامی امن و سلامتی کے لئے خطرہ ہیں اور ان کا سلسلہ فوری طور پر بند ہونا چاہئے۔
اسماعیل بقائی نے اسی کے ساتھ اقوام متحدہ کی سلامتی کونسل سے اس حوالے سے اپنی خاموشی توڑنے اور اسلامی تعاون تنظیم او آئی سی نیز اسلامی حکومتوں سے یمن کے خلاف جارحیت، بین الاقوامی امن و سلامتی کی خلاف ورزی اور قانون شکنی روکنے کے لئے موثر اور ہمہ گیر اقدام کا مطالبہ کیا ہے۔
