خانوادہ شیعہ لاپتہ عزاداران کی کراچی پریس کلب میں پریس کانفرنس
کراچی پریس کلب میں پریس کانفرنس میں کہا گیا کہ جبری گمشدگی کسی ایک تنظیم کا مسئلہ نہیں ہے یہ شیعہ قوم کا مسئلہ ہے، پوری قوم ان افرادکے ساتھ ہے
شیعیت نیوز : کراچی پریس کلب میں خانوادہ شیعہ لاپتہ عزاداران کی جانب سے پریس کانفرنس کی گئی۔
کانفرنس میں تمام شیعہ تنظیموں کے رہنماؤں اور علما کرام نے حکومت سے مطالبہ کیا ہے کہ لاپتہ شیعہ افراد کا مسئلہ فوری حل کیا جائے۔
دہشت گردی کی روک تھام کے لیے موثر پالیسی اور اقدام کیے جائیں۔
21 رمضان کے جلوس میں لاپتہ شیعہ افراد کی بازیابی کے لیے احتجاج کیا جائے گا۔
علامہ عقیل موسیٰ نے جبری گمشدہ ہونے والے نوجوانوں کے ورثا کے ہمراہ خطاب کرتے ہوئے کہا کہ لاپتہ شیعہ افراد کے مسئلے پر سپریم کورٹ سے رجوع کررہے ہیں، ہمیں امید ہے کہ اس اہم مسئلہ پر ہمیں عدالت اعلی انصاف فراہم کرے گی۔
ہم ایک بار پھر وزیراعظم شہباز شریف اور آرمی چیف کو اس مسئلہ کی جانب متوجہ کرنا چاہتے ہیں۔
یہ بھی پڑھیں : سربراہ انصاراللہ کی جانب سے یمن پر حالیہ امریکی حملوں کا رد عمل آ گیا
شیعہ لاپتہ جوانوں کا مسئلہ حل ہونا چاہیئے اور ہمارے بیسیوں لاپتہ شیعہ جوان بازیاب ہونے چاہیئے، ہمارے پیاروں نے اگر کوئی جرم کیا ہے تو اس کو عدالت میں پیش کیا جائے۔
شیعہ لاپتہ افراد کا مسئلہ اب مزید پیچیدہ نہیں ہے مگر اب مزید کئی جوانوں کو جبری گمشدگی کا شکار کر دیا گیا ہے۔
اگر ہمارا مسئلہ حل نہیں ہوا تو ہم احتجاج کا حق ہر مقام اور ہر مرحلے پر استعمال کریں گے۔
ہم پر امن پاکستانی ہیں، ہمیں بتایا جائے کہ اپنے ہی پر امن شہریوں کے ساتھ یہ سلوک کیوں کیا جا رہا ہے۔
21 رمضان المبارک کو ملت تشیع ہمارے ساتھ مرکزی جلوس عزاء میں مظلوم لاپتہ عزاداروں کی رہائی کے لیے صدائے احتجاج بلند کرے گی۔
