پاکستانی فوج کا کالعدم لشکر جھنگوی کے دہشت گردوں کے خلاف کامیاب آپریشن

شیعیت نیوز : پاکستانی فوج کے شعبہ تعلقات عامہ (آئی ایس پی آر) نے دعویٰ کیا ہے کہ سیکیورٹی فورسز نے جنوبی وزیرستان کے علاقے سراروغہ میں کالعدم لشکر جھنگوی دہشت گردوں کی موجودگی کی اطلاع پر انٹیلی جنس بیسڈ آپریشن کیا۔

آپریشن کے دوران سیکیورٹی اہلکاروں نے دہشت گردوں کے ٹھکانے کو مؤثر طریقے سے نشانہ بنایا، جس کے نتیجے میں 30 دہشت گرد مارے گئے۔ ان دہشت گردوں کا تعلق کالعدم لشکر جھنگوی اور سپاہ صحابہ سے تھا۔

یہ بھی پڑھیں : پارا چنار جانے والے کانوائے پر دہشت گردوں کے حملے کے بعد زخمی ڈرائیور کا دل دہلا دینے والا بیان

پاکستانی فوج کا کہنا ہے کہ علاقے میں کسی ممکنہ دہشت گرد کو ختم کرنے کے لیے سینیٹائزیشن آپریشن بھی کیا گیا۔

13 فروری کو سیکیورٹی فورسز نے خیبرپختونخوا کے علاقوں میں 5 مختلف کارروائیوں کے دوران 13 دہشت گردوں کو ہلاک کیا تھا۔

واضح رہے کہ گزشتہ روز خیبرپختونخوا کے ضلع کرم میں شرپسندوں کے حملوں کے بعد امدادی قافلے کو بچانے کی کوششوں میں 5 سیکیورٹی اہلکار جاں بحق ہوگئے تھے۔

خیبرپختونخوا حکومت نے پیر کو متعدد حملوں میں 5 سیکیورٹی اہلکاروں کے جاں بحق ہونے کے بعد کرم میں شرپسندوں کے خلاف نئے آپریشن کا اعلان کیا تھا۔