لکی مروت میں آپریشن: لشکر جھنگوی کے 5 دہشتگرد ہلاک، 2 گرفتار
پاکستانی سیکیورٹی فورسز کا مؤثر انٹیلیجنس بیسڈ آپریشن، خیبرپختونخوا میں دہشتگردوں کے خلاف کامیاب کارروائیاں جاری
شیعیت نیوز: پاکستانی فوج کے شعبہ تعلقات عامہ (آئی ایس پی آر) کے مطابق، سیکیورٹی فورسز نے 4 دسمبر کو ضلع لکی مروت میں دہشتگردوں کی موجودگی کی اطلاع پر ایک انٹیلیجنس بیسڈ آپریشن کیا، جس میں دہشتگردوں کے ٹھکانے کو مؤثر طریقے سے نشانہ بنایا گیا۔
اعلامیے کے مطابق، آپریشن کے نتیجے میں کالعدم لشکر جھنگوی کے 5 دہشتگردوں کو ہلاک، جبکہ 2 کو زخمی حالت میں گرفتار کر لیا گیا۔
یہ بھی پڑھیں: کرم میں حالات نارمل نہیں، حکومتی دعوؤں کے بالکل برعکس ہیں، رہنما مجلس وحدت المسلمین
یاد رہے کہ یکم دسمبر کو سیکیورٹی فورسز نے خیبرپختونخوا کے 2 مختلف اضلاع میں کارروائیاں کرتے ہوئے 8 دہشتگردوں کو ہلاک اور 9 کو زخمی کر دیا تھا۔ اس دوران پاکستانی فوج کے ایک کیپٹن سمیت 2 اہلکار جاں بحق ہو گئے تھے۔
اس کارروائی سے 3 روز قبل بھی سیکیورٹی فورسز نے خیبرپختونخوا کے ضلع خیبر کے علاقے باغ میں کارروائی کرتے ہوئے 4 دہشتگردوں کو ہلاک اور 3 کو زخمی کر دیا تھا۔
