شیعہ علماء کونسل وسطی پنجاب کے انتخابات میں سید ساجد حسین شاہ صدر منتخب

شیعیت نیوز: شیعہ علماء کونسل وسطی پنجاب کے انتخابات کا مرحلہ مکمل ہو گیا۔ صوبائی کونسل کے ارکان نے کثرت رائے سے سید ساجد حسین شاہ کو صوبائی صدر منتخب کر لیا۔

صوبائی کونسل کا اجلاس جامعہ منہاج الحسین جوہر ٹاون میں منعقد ہوا، جس میں الیکشن کمیشن کے فرائض مرکزی نائب صدر معظم علی بلوچ نے سر انجام دیے۔ وسطی پنجاب کی صدارت کے لیے 10 نومبر کو فیصل آباد میں ہونے والے انتخاب کے پہلے مرحلے کے بعد ساجد حسین شاہ اور قاسم علی قاسمی امیدوار تھے۔

یہ بھی پڑھیں: کالعدم سپاہ صحابہ کے رہنما اورنگزیب فاروقی کے ناقابل ضمانت وارنٹ جاری

مرکزی نائب صدر علامہ سبطین حیدر سبزواری نے نو منتخب صدر سے حلف لیا۔ اس موقع پر سید ساجد حسین شاہ نے خطاب کرتے ہوئے کہا کہ شیعہ علماء کونسل ایک الٰہی تنظیم ہے، جس کی قیادت نے ہمیشہ ملکی سلامتی اور قومی وقار کے لیے جدوجہد کی ہے۔ اس تنظیم کی بنیادوں میں شہید قائد علامہ عارف حسین الحسینی سمیت ہزاروں شہدا کا خون شامل ہے۔

انہوں نے کہا کہ وہ قائد ملت جعفریہ علامہ سید ساجد علی نقوی کے ادنیٰ کارکن کی حیثیت سے کام کریں گے۔ پرانے طریقے چھوڑ کر تنظیم کو جدید طریقے سے چلائیں گے، جس کے لیے سینئرز سے بھی مشاورت کی جائے گی۔

علامہ سبطین سبزواری نے خطاب کرتے ہوئے کہا کہ الیکشن کسی کی ہار یا جیت نہیں، سب کو ملی امور میں اپنا کردار ادا کرنا چاہیے۔ قائد ملت جعفریہ کی پالیسیوں کے مطابق عوام کی خدمت کریں اور قیادت کے دست و بازو بنیں۔ عہدہ کچھ نہیں، اصل ذمہ داری عہدے کے تقاضے پورے کرنا ہے۔

قاسم علی قاسمی نے نو منتخب صدر کو ہار پہنایا اور مبارکباد دیتے ہوئے کہا کہ تنظیم کے دستور کے مطابق انتخابات میں ساجد حسین شاہ کا انتخاب خوش آئند ہے۔ وہ وسطی پنجاب میں قائد ملت جعفریہ کے نمائندے ہوں گے اور ہم ان کے ساتھ چلیں گے۔