اب وقت آگیا ہے کہ مسلم حکمرانوں کی غیرت جاگ جائے، صدر ملی یکجہتی کونسل

شیعیت نیوز : جمعیت علمائے پاکستان و ملی یکجہتی کونسل کے صدر ڈاکٹر صاحبزادہ ابوالخیر محمد زبیر نے اسرائیلی حملے میں حماس کے نئے پولیٹکل بیورو کے سربراہ یحی السنوار کی شہادت پر تعزیت اور افسوس کا اظہار کیا۔

انہوں نے کہا کہ یحی السنوار حماس کے بڑے نڈر، مجاہد اور جنگجو رہنما تھے، کہا جاتا ہے کہ وہ 7 اکتوبر 2023 اسرائیل پر حملہ کے ماسٹر مائنڈ بھی تھے۔

انہوں نے طویل عرصہ اسرائیلی قید میں گزارا وہ ساری زندگی باطل قوتوں کے خلاف برسر پیکار رہے، اسرائیل کے خلاف ایک موثر اور جذبہ جہاد سے لبریز توانا آواز تھے۔

اسماعیل ہانیہ، حسن نصراللہ اور اب یحی السنوار کی شہادت اسرائیلی بربریت اور ظلم کی انتہا ہے اور اسلامی ممالک کے سربراہان کی بے حسی کا نتیجہ ہے۔

مسلم حکمرانوں کی بے غیرتی اور بے حسی اسرائیل کو شہ دینے کا باعث بن رہی ہے، یہی وجہ سے اسرائیل کے ظالمانہ اقدامات بڑھتے جارہے ہیں۔

یہ بھی پڑھیں : اب ہمیں 15 لاکھ یحییٰ سنواروں کا سامنا ہے، اسرائیلی تجزیہ نگاروں کا انتباہ

اب وقت آگیا ہے کہ مسلم حکمرانوں کی غیرت جاگے اور وہ اسرائیلی ظلم و بربریت کے خلاف صدائے حق بلند کریں۔

اس میں بھی کوئی شک نہیں ہے کہ یحی السنوار کی شہادت سے حماس کے مجاہدین کو نیا جوش اور ولولہ ملے گا اور وہ مزید قوت کے ساتھ اسرائیل کے خلاف جدوجہد کو تیز تر کریں گے کیونکہ شہادت تو مومن کی آرزو ہوتی ہے۔

اسرائیل مسلمانوں کو صفحہ ہستی سے مٹانے کیلئے ہر توانا آواز کو دبانے کے منصوبہ پر عمل پیرا ہے۔

عالم اسلام کے مسلم حکمرانوں کو اسرائیلی جارحیت کا فوری نوٹس لینا چاہئے۔

اسرائیل کے مکروہ عزائم عالم اسلام کیلئے خطرے کی گھنٹی ہیں۔