غزہ میں صیہونی حملے: اسکول پر فضائی حملے میں پانچ فلسطینی شہید

شیعیت نیوز: غزہ شہر کے جنوب مشرق میں الزیتون علاقے میں واقع ایک اسکول پر غاصب صیہونی حکومت کے فضائی حملے میں کم سے کم پانچ فلسطینی شہید اور کئی دیگر زخمی ہو گئے۔ شہید ہونے والوں میں ایک عورت اور دو بچے شامل ہیں۔

الزیتون کے اسکول پر حملے میں شہید ہونے والوں کی شناخت کرلی گئی ہے۔ یہ صیہونی فضائی حملہ ایسی حالت میں کیا گیا ہے کہ غزہ کے مرکز میں النصیرات کیمپ کے شمال میں ایک علاقے پر جارح صیہونی فوج نے شدید گولہ باری بھی کی ہے۔

دوسری جانب، مقبوضہ فلسطین کی غاصب صیہونی حکومت کی جارح فوج نے غزہ کے مرکز میں البریج کیمپ کے شمال میں فلسطینی شہریوں پر اندھا دھند فائرنگ کی ہے جس میں متعدد فلسطینی شدید طور پر زخمی ہو گئے۔ پچھلے چوبیس گھنٹے کے دوران، غزہ پر صیہونی فوج کے حملوں میں جو الگ الگ مقامات پر کیے گئے، تیس سے زائد فلسطینی شہید اور درجنوں دیگر زخمی ہوئے ہیں۔

اس دوران، مقبوضہ فلسطین کی غاصب صیہونی حکومت کی جارح فوج نے غرب اردن کے شمال میں واقع کئی علاقوں پر حملہ کیا ہے۔ صیہونی فوجیوں نے جنین پر شدید حملہ کیا۔ رپورٹ کے مطابق، صیہونی فوج نے ایک مکان کو نشانہ بنایا اور الشرقی علاقے کا محاصرہ کرلیا، جہاں فلسطینیوں اور صیہونی فوجیوں کے درمیان شدید جھڑپ بھی ہوئی۔

یہ بھی پڑھیں : یمنی میزائل حملہ: صہیونی فضائیہ نے شکست تسلیم کر لی

مقبوضہ فلسطین کی غاصب صیہونی حکومت کی جارح فوج نے رام اللہ کے شمال مغرب میں قراوہ علاقے پر بھی حملہ کیا۔ غزہ میں سرکاری ذرائع کا کہنا ہے کہ غزہ کے خلاف جاری وحشیانہ جنگ و جارحیت اور نتیجے میں ہونے والے جانی و مالی نقصانات کی بنا پر رونما ہونے والا المیہ بد سے بدتر ہوتا جا رہا ہے۔ قبل اس کے کہ حالات مزید بدتر ہوجائیں، بیس لاکھ سے زائد فلسطینیوں کی انسانی امداد کی اشد ضرورت ہے۔

در ایں اثنا، غزہ کے انفارمیشن سینٹر نے ایک بیان میں اعلان کیا ہے کہ پناہ گزینوں کی تعداد مسلسل بڑھتی جا رہی ہے اور موسمی سرما کی آمد کی بنا پر حالات مزید خراب ہو سکتے ہیں۔ بنابریں، رونما ہونے والے المیے کو پیچیدہ ہونے سے بچانے کے لیے بنیادی اقدامات کیے جانے کی ضرورت ہے۔