شہادت ِ بنتِ پیغمبر حضرت فاطمہ زہراؑ کے موقع پر لاہور میں پاکستان کے سب سے بڑے ماتمی جلوس کا انعقاد

شیعیت نیوز: بنتِ پیمبر ؐ خاتون جنت، حضرت فاطمہ زہرا سلام اللہ علیہا کا یوم شہادت ملک بھر کی طرح لاہور میں بھی مذہبی جذبے اور عقیدت و احترام کیساتھ منایا گیا،لاہور میں پاکستان کا سب سے بڑا ماتمی جلوس برآمد ہوا جس میں ہزاروں مرد و خواتین عزاداروں نے شرکت کی،جلوس عزا کی قیادت مرکزی وائس چیئرمین مجلس وحدت مسلمین علامہ سید احمد اقبال رضوی نے کی۔

اس موقع پر شہر کی تمام امام بارگاہوں میں مجالس عزاء اور شدید سرد موسم کے باوجود ماتمی جلوسوں کا انعقاد کیا گیا۔ مجالس عزاء سے خطاب کرتے ہوئے علمائے کرام، واعظین اور ذاکرین نے سیرتِ فاطمہ زہرا سلام اللہ علیہا پر روشنی ڈالی اور اسوہ بتولؐ کو طبقہ نسواں کیلئے نمونہ کامل قرار دیا۔ اس موقع پر یوم شہادت خاتون جنت ؑ کا مرکزی جلوس موچی گیٹ سے برآمد ہوا، جو مقررہ راستوں سے ہوتا ہوا دربار بی بی پاکدامن پہنچ کر اختتام پذیر ہوا، جلوس کی قیادت مجلس وحدت مسلمین پاکستان کے مرکزی وائس چیئرمین علامہ احمد اقبال رضوی نے کی۔

یہ بھی پڑھیں: خواتین عالم کیلئے ماں، بیوی اور بیٹی ہر زاویہ نگاہ سے بہترین نمونہ عمل اور آئیڈیل شخصیت جناب سیدہ فاطمہ زہرا ؑ کی ذات ہے،علامہ ساجد نقوی

اس کے علاوہ شہر بھر میں مجالس سے عزا کا سلسلہ بھی جاری رہا۔ امام بارگاہ گلستان زہرا ایبٹ روڈ پر مجلس عزا سے خطاب کرتے ہوئے علامہ سید علی حسین مدنی نے کہا کہ حضرت فاطمہ زہرا ؑ جو تمام مکاتب کے نزدیک عالمین کی عورتوں کی سردار اور خاتون جنت ہیں، جن کا فقط سنی شیعہ نہیں بلکہ پوری انسانیت دل سے احترام کرتی ہے، حضرت فاطمہ ؑ باغ نبوت کا پھول اور کار پیمبری میں شریک رسول ؐ ہیں۔ انہوں نے کہا کہ قرآن عظمت محمد و آل محمد کا قصیدہ ہے، جس سے سبق حاصل کر کے ہم اپنی نجات کا سامان کر سکتے ہیں۔ مجالس کے بعد ماتمی جلوس بھی برآمد ہوئے جن میں عزاداروں نے نوحہ خوانی اور ماتم کیا۔