یوکرینی فوج کا جزیرہ نما کریمیا پر ڈرون حملہ
شیعیت نیوز: جزیرہ نما کریمیا کے مقامی حکام نے بتایا کہ یوکرین کی فوج نے آج صبح ایک بار پھر اس علاقے کو بڑے پیمانے پر ڈرون حملوں سے نشانہ بنایا ہے۔
رشیا ٹوڈے نے خبر دی ہے کہ روس کے دارالحکومت ماسکو کے شہر پر یوکرینی فوج کے ناکام ڈرون حملے کے چند گھنٹے بعد جزیرہ نما کریمیا کے گورنر سرگئی اکسیونوف نے اعلان کیا کہ 11 یوکرینی ڈرون فضائی دفاعی نظام اور الیکٹرانک جنگی آلات کے ساتھ تباہ کر دیے گئے ہیں۔
چند گھنٹے پہلے ماسکو کے میئر "سرگئی سوبیانین” نے اعلان کیا کہ آج صبح 4:00 بجے یوکرائن کے دو ڈرونز حملہ آور ہوئے جنہیں فوج نے الیکٹرونک جنگی آلات سے ناکارہ بنا دیا جو آخر کار غیر رہائشی عمارتوں سے ٹکرا گئے۔
یہ بھی پڑھیں : عراق میں امریکی سفیر کی سرگرمیوں پر سربراہ مقتدیٰ الصدر کا شدید ردعمل
روس کی وزارت دفاع نے ایک مختصر بیان میں اعلان کیا کہ "آج صبح کیف حکومت کا دہشت گردانہ حملہ جو کہ دو ڈرونز کے ذریعے کیا گیا تھا، ناکام بنا دیا گیا”۔
روس کی وزارت دفاع نے اعلان کیا ہے کہ 24 جولائی کی صبح کیف کی جانب سے ماسکو شہر کی دو عمارتوں کو ڈرون طیاروں نے نشانہ بنانے کی کوشش کی تاہم اس دہشت گردانہ حملے کی کوشش کو ناکام بنا دیا گیا۔ بعض ذرائع نے بتایا کہ ماسکو میں دو دھماکوں کی آوازیں سنی گئیں۔
ماسکو کے محکمۂ ٹرانسپورٹ کا کہنا ہے کہ ماسکو کی کومسومولسکی”Komsomolsky” شاہراہ کو ٹریفک کیلئے بند کر دیا گیا۔ یہاں پر تباہ شدہ ایک ڈرون کا ملبہ پڑا ہے اور یہ شاہراہ روس کی وزارت دفاع کے قریب ہے۔
سوشل میڈیا صارفین نے لکھا کہ ڈرون زیر تعمیر کمرشل عمارت سے ٹکرا گیا اور ان کے پھٹنے سے قریبی رہائشی مکانات کے شیشے ٹوٹ گئے۔
رشیا ٹو ڈے نے روسی حکام کے حوالے سے اطلاع دی ہے کہ اس واقعے میں کوئی زخمی نہیں ہوا اور زیادہ نقصان بھی نہیں ہوا۔
