توہین قرآن کی مذمت میں ہچکچاہٹ اور تاخیر دوہرے معیار کو ظاہر کرتی ہے، امیرعبداللہیان

شیعیت نیوز: ایران کے وزیر خارجہ امیرعبداللہیان نے قرآن کی توہین کو انسانی حقوق کی خلاف ورزی اور 2 ارب مسلمانوں کے خلاف نفرت، تشدد اور دشمنی کو ہوا دینے کے مترادف قرار دیا ہے۔ انہوں نے کہا کہ اس طرح کے اقدامات کی مذمت میں ہچکچاہٹ اور تاخیر دوہرے معیار کو ظاہر کرتی ہے۔

حسین امیرعبداللہیان نے قرآن کریم کی توہین کے بارے میں انسانی حقوق کونسل کے ہنگامی اجلاس کے نام اپنے ویڈیو پیغام میں کہا ہے کہ ایران انسانی حقوق کونسل میں اس فوری بحث کے انعقاد کو ضروری، اہم اور بروقت سمجھتا ہے۔

ایران کے وزیر خارجہ نے سویڈن میں قرآن پاک کی بے حرمتی کے حالیہ واقعے کو جو رواں سال کے دوران یورپی ممالک میں اس نوعیت کا چھٹا واقعہ ہے، ایسا اقدام قرار دیا جو کھلے عام مسلمانوں کے خلاف تشدد، نفرت، امتیاز اور دشمنی کو ہوا دینے کا سبب بن رہا ہے۔

یہ بھی پڑھیں : ایرانی پارلیمنٹ کے اسپیکر قالیباف کی سویڈن میں قرآن مجید کی توہین کی بھرپور مذمت

حسین امیر عبداللہیان نے قرآن مجید کی توہین کو نہ صرف انسانی حقوق کی خلاف ورزی قرار دیا بلکہ دنیا بھر کے 2 ارب سے زائد مسلمانوں کے حقوق کی پامالی قرار دیا۔

ایران کے وزیر خارجہ نے کہا کہ ہم سویڈن اور دیگر یورپی ممالک کے حکام سے پرزور درخواست کرتے ہیں کہ وہ ان گھناؤنی حرکتوں کے مرتکب افراد کے خلاف فوری اور موثر اقدامات کریں تاکہ مستقبل میں ایسے واقعات کے اعادے کو روکا جاسکے۔

امیر عبداللہیان نے مزید کہا کہ ایسے اقدامات کی مذمت یا روک تھام میں کوئی ہچکچاہٹ یا تاخیر صرف دوہرے معیاروں کے رجحان کی تقویت دینے اور اظہار رائے کی آزادی کے غلط استعمال کو جواز فراہم کرنے کا باعث بنے گی۔