داعش کو دوبارہ متحرک ہونے سے روکنے کیلئے اقدامات جاری رکھیں گے، سعودی عرب
شیعیت نیوز: سعودی عرب کے دارالحکومت ریاض میں داعش کے خلاف ’’بین الاقوامی اتحاد‘‘ کا وزارتی اجلاس ہوا، جس سے سعودی اور امریکی وزرائے خارجہ نے خطاب کیا۔
اس موقع پر سعودی وزیر خارجہ شہزادہ فیصل بن فرحان نے کہا کہ سعودی عرب جہاں کہیں بھی ممکن ہے داعش کا پیچھا کرنے کی کوشش کرے گا۔
ان کا مزید کہنا تھا کہ شدت پسندی کا مقابلہ اور داعش کو دوبارہ متحرک ہونے سے روکنے کیلئے اقدامات جاری رکھیں گے۔
سعودی عرب دہشت گردی اور انتہاء پسندانہ نظریات کا مقابلہ کرنے کی ضرورت پر یقین رکھتا ہے۔
سعودی وزیر خارجہ شہزادہ فیصل بن فرحان نے کہا کہ تمام ممالک رواداری اور مکالمے کو عام کرنے کیلئے مل کر کام کریں۔
اس موقع پر امریکی وزیر خارجہ انٹونی بلنکن نے اپنے خطاب میں کہا کہ افغانستان اور کچھ افریقی علاقوں میں داعش کے حملوں میں اضافے پر تشویش ہے۔
انہوں نے کہا کہ عسکریت پسندوں کو شام اور عراق کے کیمپوں میں رکھنے سے تنظیم کے دوبارہ متحرک ہونے کا خطرہ ہے۔
یہ بھی پڑھیں : سید حسن نصراللہ سے قطع تعلق مت کرو، بشار اسد کی میشل عون کو نصیحت
دوسری جانب سعودی عرب میں دو ہفتہ سے جاری عزم عقاب 23 مشترکہ فوجی مشقیں، سعودی عرب میں آج ختم ہو گئی ہے، اس میں امریکہ اور عرب ممالک کے اتحاد نے مل کر مشقیں انجام دی تھیں۔
خلیج آنلائین کی رپورٹ کے مطابق سعودی عرب کی وزارت دفاع نے اپنے بیان میں کہا ہے خلیج فارس تعاون تنظیم کےاراکین اور امریکہ کے درمیان ہونے والی فوجی مشقوں کا مقصد فوجی توازن کا ارتقاء، خطرات کا مقابلہ کرنے کےلئے خود کو آمادہ کرنا، اور ایک دوسرے کے تجربات سے استفادہ کرنا تھا۔
اس کے علاوہ خلیج فارس تعاون تنظیم کے ممالک کے درمیان اسٹریٹیجک اور فوجی تعلقات کی مضبوطی کا اظہار کرنا تھا۔
رپورٹ کے مطابق اس مشق میں شامل ممالک نے فرضی دشمن کے خلاف میزائل بردار فضائی حملے، دشمن کے ہوائی حملوں کو روکنے، فضا میں طیاروں کو ایندھن فراہم کرنے، زمینی اور سمندری اہداف کے خلاف اقدامات، اور الیکٹرانک جنگ کی مشقیں انجام دی گئیں۔
یاد رہے کہ اس مشق کے شروع ہونے سے پہلے ریاض اور فلوریڈا میں علمی کانفرنسوں کا انعقاد کیا گیا تھا۔
