شام: لاذقیہ میں دہشت گردوں کے حملے میں دو شامی فوجی شہید

شیعیت نیوز: شام میں متحارب قوتوں کے مصالحت کے لیے روسی مرکز کے نائب اولیگ گورینوف نے اتوار کے روز اعلان کیا کہ لاذقیہ میں دہشت گرد گروہوں کے حملوں کے نتیجے میں دو شامی فوجی شہید اور تین زخمی ہو گئے۔

گورینوف نے کہا کہ صوبہ لاذقیہ میں شام کی سرکاری فوج کے ٹھکانوں پر دہشت گرد گروہوں کی گولہ باری کے نتیجے میں کم از کم دو شامی فوجی شہید اور تین دیگر زخمی ہو گئے۔

شام میں اس روسی اہلکار کے مطابق گذشتہ روز کے دوران النصرہ فرنٹ دہشت گرد گروہ کے چار حملے بھی ادلب کے ڈی ایسکلیشن علاقے میں ہوئے ہیں۔

یہ بھی پڑھیں : فلسطینی عوام کا انتخاب مزاحمت ہے جو واحد جائز ہتھیار ہے، فلسطینی مزاحمتی گروپ

دوسری جانب شام کے شہر الحسکہ کے عوام نے اپنے ملک کے خلاف مغرب کی جاری پابندیوں کے خلاف احتجاجی اجتماع منعقد کیا ہے۔

الاخباریہ ٹی وی کی رپورٹ کے مطابق الحسکہ کے مرکزی اسکوائر پر کئے جانے والے اس اجتماع میں شریک شامی عوام نے پابندیوں اور شام کا محاصرہ ختم کئے جانے کا مطالبہ کیا۔

شام کے احتجاجی مظاہرین نے اپنے ہاتھوں میں ایسے بینر اور پلے کارڈ اٹھا رکھے تھے جن پر شام کے محاصرے اور عائد کردہ پابندیوں کی مذمت میں نعرے لکھے ہوئے تھے اور مظاہرین کا کہنا تھا کہ شام کے خلاف محاصرے کو دہشت گردی کی حمایت سے شام پر ڈالے جانے والے دباؤ کے ایک ہتھکنڈے کے طور پر استعمال کیا گیا ہے۔

مظاہرین نے دنیا کے تمام حریت پسندوں سے شام کے خلاف جاری پابندیوں کی مذمت کئے جانے کا مطالبہ کیا۔

واضح رہے کہ ترکی اور شام میں آنے والے خوفناک زلزلے میں ابتک پچاس ہزار سے زائد اموات ریکارڈ کی جا چکی ہیں جبکہ شام کے خلاف مغرب کی جاری پابندیوں کی بنا پر نہ صرف دواؤں اور طبی وسائل کی شدید قلت کا سامنا ہے بلکہ ان پابندیوں کے نتیجے میں زلزلہ متاثرین کی کوئی خاص مدد تک نہیں ہو پا رہی ہے اور اس صورت حال پر خاموشی انسان دوستانہ اداروں اور انسانی حقوق کی تنظیموں سمیت پوری عالمی برادری کے لئے شرمناک ہے۔