قرآن پاک کی پناہ میں مایوسی، ناکامی اور فرسودگی کا تصور نہیں: صدرِ ایران رئیسی

شیعیت نیوز: ایران میں قرآن پاک کے 39 ویں بین الاقوامی مقابلوں کی اختتامی تقریب، تہران کے سربراہی کانفرنس ہال میں منعقد ہوئی جسے صدر مملکت سید ابراہیم رئیسی نے خطاب کیا۔

صدر ایران سید ابراہیم رئیسی نےانتالیسویں بین الاقوامی قرآنی مقابلوں کی اختتامی تقریب سے خطاب کرتے ہوئے کہا کہ ہماری عزت طاقت اور ایکتا کا راز قرآنی تعلیمات پر توجہ میں مضمر ہیں اور اگر سبھی کتاب خدا قرآن پاک کی پناہ میں آ جائیں تو پھر مایوسی، ناکامی اور فرسودگی کا سوال ہی پیدا نہیں ہوتا۔

صدرِ ایران نے قرآن پاک اور نبی کریم (ص) کی ذات کو ہر دور اور پوری بشریت کے لئے باعث ہدایت و نورانیت اور بشریت پر اللہ کا احسان قرار دیا تاہم یہ بھی کہا قرآن سے صرف پرہیزگار ہی فائدہ اٹھا پاتے ہیں۔

سید ابراہیم رئیسی نے کہا کہ دشمنان اسلام اپنی ناکامی و ناتوانی کی بنا پر قرآن پاک کی اہانت کرتے ہیں اور یہ ان کی بے بسی کی انتہا کا منھ بولتا ثبوت ہے۔ انہوں نے یہ بات زور دے کر کہی کہ قرآن کریم کی منشأ ایسے معاشرے کی تشکیل ہے جو نہ تو کسی پر ظلم کرتا ہو اور نہ ظلم کے سامنے جھکتا ہو۔

یہ بھی پڑھیں : ایران کا فلسطینیوں کی نسل کشی کو روکنے کیلئے فوری بین الاقوامی اقدام اٹھانے کا مطالبہ

اس تقریب میں صدر رئیسی نے قرآنی مقابلوں کے فاتحین کو انعامات سے بھی نوازا۔ اس تقریب میں 6 خواتین اور 9 مردوں سمیت 15 ممتاز

افراد کو حفظو قرائت کے مختلف شعبوں میں اعزازات سے نوازا گیا۔

مقابلوں کے ابتدائی مرحلے میں 80 ممالک کے 150 شرکاء نے حفظ، مطالعہ، تحقیق اور ترتیل کے شعبوں میں حصہ لیا۔

اس مقابلے میں پہلی بار خواتین کے لئے شعبۂ ترتیل کو بھی شامل کیا گیا تھا اور آخری مرحلے میں 33 ممالک اور 52 شرکاء نے حفظ، تحقیق (مجلسی تلاوت) اور ترتیل کے شعبوں میں حصہ لیا۔

واضح رہے کہ ایران میں قرآن پاک کے 39 ویں بین الاقوامی اور سالانہ مقابلے 18 فروری کو پارلیمنٹ اسپیکر محمد باقر قالیباف، وزیر ثقافت محمد مہدی اسماعیلی، تہران کے امام جمعہ آیت اللہ سید احمد خاتمی اوقاف اور ملک کے دیگر اعلی حکام کی شرکت اور خطابات سے تہران میں شروع ہوئے تھے جو پانچ روز تک جاری رہے۔