دشمن ایرانی قوم کو پابندیوں کے ذریعے گھٹنے ٹیکنے پر مجبور کرنا چاہتے ہیں، رضا نوری

شیعیت نیوز: شمالی خراسان میں ولی فقیہ کے نمائندے حجۃ الاسلام والمسلمین رضا نوری نے آج سنی علماء اور شمالی خراسان کے عدالتی نظام کے درمیان ہونے والے معاہدے کے سلسلے میں منعقدہ اجلاس سے خطاب کرتے ہوئے کہا کہ شیعہ اور سنی اتحاد دشمنوں کی سازشوں کو بے اثر کر دے گا۔

انہوں نے مزید کہا کہ دشمن شیعہ اور سنی کے درمیان اس اتحاد اور ہم آہنگی سے خوفزدہ ہے، اسی لیے وہ اس اتحاد کو ہر ممکن طریقے سے تباہ کرنے کی کوشش کر رہا ہے تاکہ معاشرے میں اپنے مقاصد کو عملی جامہ پہنا سکے۔

حجۃ الاسلام والمسلمین رضا نوری نے مزید کہا کہ دشمنوں کی سازشوں کا مقابلہ کرنے کے لئے آپس میں اتحاد و اتفاق کو برقرار رکھنا لازم اور ضروری ہے۔ کیونکہ شیعہ اور سنی بھائیوں کے درمیان یہ اتحاد و یکجہتی دشمنوں کی آنکھوں میں کانٹے کی طرح کھٹکتا ہے اور انہیں اپنے تفرقہ انگیز مقاصد حاصل کرنے کا موقع نہیں ملتا۔

یہ بھی پڑھیں : بشار اسد کا مسقط کا دورہ اور عمان کے سلطان سے ان کی ملاقات

انہوں نے شیعہ اور سنی علماء کو پیغام دیتے ہوئے مزید کہا کہ شیعہ اور سنی علماء کو معاشرے کے نمونے کے طور پر دشمنوں کی سازشوں کے مقابلے میں اتحاد و اتفاق کو برقرار رکھنا چاہئے اور انہیں شیعہ اور سنی برادری میں تفرقہ پیدا کرکے اپنے مقاصد حاصل کرنے کی اجازت نہیں دینی چاہئے۔

حجۃ الاسلام والمسلمین رضا نوری نے بیان کیا کہ آج ہم ایسے حالات میں ہیں کہ عالمی تسلط اور استکباری نظام انسانی حقوق کے بہانے آئے روز ملک کے اندرونی معاملات میں مداخلت کرتا ہے اور بظاہر دوستانہ طریقے سے پروپیگنڈے کے ذریعے اپنے مفادات کو حاصل کرنے کی کوشش کرتا ہے۔

انہوں نے مزید کہا کہ آج دشمن اسلامی جمہوریہ ایران کی عظیم قوم پر دباؤ ڈالنے کے لیے ہر طرح کا حربہ استعمال کر رہے ہیں، وہ ایرانی قوم کو ہر قسم کی پابندیوں کے ذریعے گھٹنے ٹیکنے پر مجبور کرنا چاہتے ہیں۔