شہید حاج سلیمانی کا مکتب ایران اور اسلام کی سربلندی رقم کرے گا، زینب سلیمانی

شیعیت نیوز: شہید سلیمانی فاؤنڈیشن کی سربراہ زینب سلیمانی نے آج تہران کے مصلی امام خمینی میں شہید حاج سلیمانی اور ان کے ساتھیوں کی شہادت کی تیسری برسی کی تقریب کے دوران کہا کہ تین سال قبل آج کے دن شہید سلیمانی کی دیرینہ آرزو پور ہوئی، وہی آرزو جس کے حصول کے لیے بقول خود 40 سال بیابانوں اور صحراؤں میں گزارے تھے۔ شہید سلیمانی اور ان کے ساتھی شہداء بالخصوص ابومہدی المہندس، شہید پورجعفری اور شہید مظفری نیا کو یہ وصال مبارک ہو۔

زینب سلیمانی نے کہا کہ آج حاج قاسم سلیمانی کی چھوڑی ہوئی جو چیزیں ہیں وہ ان کا کردار، اخلاق اور مکتب ہے۔ یہی وہ چیزیں ہیں جن سے ایرانی قوم اور پوری ملت اسلامیہ کی ترقی اور سربلندی کو فروغ دیا جا سکتا ہے۔

شہید حاج سلیمانی کی بیٹی نے مزید کہا کہ سردار سلیمانی کا الہی اور سیاسی وصیت نامہ اور ان کی درخشاں خدمات ان کی راہ کو جاری رکھنے کا بہترین ثبوت اور دستاویز ہیں۔ رواں سال شہید سلیمانی کی وصیت کا ایک حصہ بہت نمایاں ہوا اور وہ یہ خوبصورت جملہ تھا ’’میری جان اور یہ سال آپ پر ہزار بار قربان‘‘۔

یہ بھی پڑھیں : شہید حاج سلیمانی نے خطے کی اقوام کے درمیان اتحاد اور ہم آہنگی پیدا کی، محسنی اژہ ای

دوسری جانب ایران کے پارلیمانی اسپیکر نے کہا ہے کہ سردار محاذ استقات کے شہید کمانڈر جنرل قاسم سلیمانی کے مکتب کی پیروی منطقی امور کی انجام دہی اور انفرادی و اجتماعی اصول و زندگی پرعمل کئے جانے کے مترادف ہے۔

اسلامی جمہوریہ ایران کی پارلیمنٹ مجلس شورائے اسلامی کے اسپیکرمحمد باقر قالیباف نے سردار محاذ استقامت کے شہید کمانڈر جنرل قاسم سلیمانی کی برسی کے موقع پر ان کی مثالی شخصیت کو خراج عقیدت پیش کرتے ہوئے کہا ہے کہ گتھیوں کو سلجھانا، امور کو انجام دینے کے لئے آگے بڑھنا، عوامی مسائل و مشکلات کے حل کےلئے حرکت میں رہنا اور دشمن کی سازش کو ناکام بنانے کے لئے جہد مسلسل کرنا اس شہید کمانڈر کی ایسی خصوصیات رہی ہیں کہ جنھیں بھی فراموش نہیں کیا جا سکتا۔

انھوں نے کہا کہ تحریک استقامت کا مستحکم طریقے سے جاری رہنا ہر دلعزیز سردار محاذ استقامت کا ہی مرہون منت ہے اور یہی تحریک آج امریکی خباثت اور صیہونی جرائم کے مقابلے میں مستحکم قلعہ بنی ہوئی ہے اور اس میں دو رائے نہیں کہ شہید جنرل قاسم سلیمانی کی یہ آرزوو امنگ کہ بیت المقدس آزاد ہو اور علاقے سے امریکہ نکل جائے بہت جلد پوری ہوگی۔

ایرانی پارلیمنٹ مجلس شورائے اسلامی کے اسپیکر محمد باقر قالیباف نے تاکید کی کہ سردار محاذ استقامت نے ایرانی قوم اور پوری امت مسلمہ کے سلسلے میں اپنے فرائض پر نہایت خوش اسلوبی سے عمل کیا اور خداوند متعال کی برکت و عنایت اور شہید قاسم سلیمانی کی کوششوں سے راستے سارے ہموار ہوتے گئے۔