ایران اپنی خودمختاری کی خلاف ورزی کرنے کی کوششوں کا جواب دے گا، ناصر کنعانی

شیعیت نیوز: ایرانی وزارت خارجہ کے ترجمان ناصر کنعانی نے کہا ہے کہ ملک کی خودمختاری کی خلاف ورزی کرنے کی کوششوں کا جواب دیا جائے گا۔

انہوں نے ملک میں حالیہ فسادات کے دوران ایرانیوں کے لیے دستیاب انٹرنیٹ خدمات کی حد کو بڑھانے کے لیے ایران مخالف پابندیوں کو ایڈجسٹ کرنے کے امریکی اقدام پر اپنے ردعمل کا اظہار کیا۔

انہوں نے کہا کہ امریکہ ہمیشہ ایران میں سلامتی اور استحکام کو کمزور کرنے کے درپے رہا ہے لیکن وہ اپنے مقاصد حاصل کرنے میں ناکام رہا ہے۔

کنعانی نے کہا کہ واشنگٹن بعض پابندیوں میں نرمی کرکے اپنے مقاصد حاصل کرنے کے لیے منافقت سے کام لے رہا ہے لیکن ساتھ ہی ساتھ ایران کے خلاف اپنی زیادہ سے زیادہ دباؤ کی مہم کو برقرار رکھے ہوئے ہے۔

ایرانی محکمہ خارجہ کے ترجمان نے اس بات پر زور دیا کہ ایران کی خودمختاری کی خلاف ورزی کی کوششوں کا جواب دیا جائے گا۔

یہ بھی پڑھیں : مظلوموں کی آواز، قاسم سلیمانی جیسے شہیدوں کی آواز ہے، صدر سید رئیسی

دوسری جانب ایرانی وزارت خارجہ کے ترجمان نے کہا ہے کہ اسلامی جمہوریہ ایران یوکرین کی حکومت کے تہران کے ساتھ سفارتی تعلقات کے بارے میں فیصلے کا مناسب جواب دے گا۔

انہوں نے یوکرین حکومت کے فیصلے پر افسوس کا اظہار کرتے ہوئے کہا کہ یہ فیصلہ غیر ملکی میڈیا کے پروپیگنڈے اور غیر مصدقہ رپورٹس کے تحت کیا گیا۔

کنعانی نے یوکرین اور روس کے درمیان تنازع کے تناظر میں ایران کی فعال غیر جانبداری کی پالیسی کا بھی حوالہ دیا اور کہا کہ ایران کسی بھی جنگ کی مخالفت کرتا ہے اور دونوں متحارب ممالک کے درمیان اختلافات کے پرامن حل پر یقین رکھتا ہے۔

انہوں نے اس بات پر زور دیا کہ ایرانی وزیر خارجہ اور ان کے روس اور یوکرین کے ہم منصبوں کے درمیان گزشتہ چند مہینوں میں ہونے والی ملاقاتوں اور فون پر بات چیت کا مقصد تنازع کے حل میں مدد کرنا تھا۔

محکمہ خارجہ کے ترجمان نے یوکرین کی حکومت کو مشورہ دیا کہ وہ تیسرے ممالک سے متاثر نہ ہو جو تہران کے ساتھ ملک کے تعلقات کو خراب کرنا چاہتے ہیں۔