فلسطینی املاک اور اقصیٰ کے خلاف اسرائیلی کارروائیاں تیز ہوگئیں، محمد حمادہ 

شیعیت نیوز: فلسطینی تحریک مزاحمت حماس کے ترجمان محمد حمادہ  نے قرار دیا ہے کہ فلسطینیوں کی املاک، زمین اور مقدس مقامات پر اسرائیل نے قبضوں اور حملوں میں شدت پیدا کر دی ہے تاکہ نئی یہودی بستیوں کے قیام میں تیزی لاتے ہوئے فلسطین کو یہودیانے کے منصوبے کو آگے بڑھا سکے۔

ایک بیان میں ترجمان حماس نے یہودیوں کو بسانے کے لیے 1446 رہائشی یونٹس کے اسرائیلی  تعمیراتی منصوبے کو جنگی جرائم کا نام دیا۔ یہ 1446 نئے رہائشی یونٹ مقبوضہ یروشلم کے علاقے صور باہر ٹاؤن میں تعمیر کیے جانا ہیں۔

محمد حمادہ نے زور دے کر کہا کہ اسرائیلی یہودیوں بستیوں کے منصوبے اور عربوں کا صفایا کر دینے کے مذموم ارادے کبھی کامیاب نہیں ہوں گے۔ یہ ہی یروشلم کی اسلامی شناخت کو ختم کرنے دیا جائے گا۔ ترجمان حماس نے اس سلسلے میں عالمی برادری کی خاموشی کو بھی قابل مذمت  جرم قرار دیا۔

یہ بھی پڑھیں : رام اللہ میں اسرائیلی فوج کی فائرنگ سے سولہ سالہ فلسطینی نوجوان شہید

حماس ترجمان محمد حمادہ نے مزید کہا کہ ’’عرب دنیا اور اسلامی ممالک کو متوجہ کرتے ہوئے کہا کہ وہ اپنی تاریخی ذمہ داری ادا کریں، جن میں مسجد اقصی اور دوسرے مقدس مقامات کا تحفظ اولین ذمہ داری ہے۔ ہم فلسطینی اپنی جدو جہد کو تمام تر ممکنہ طریقوں سے جاری رکھیں گے۔‘‘

دوسری جانب  اسرائیلی فوجی عدالت نے حماس کے ایک سینئیر رہنما کی نظر بندی میں توسیع کر دی ہے۔ اسرائیلی فوجی عدالت کی طرف سے کیے گئے فیصلے کے مطابق حماس کے ذمہ دار شیخ علی عبدالرب کو مزید تین ماہ قید میں رہنا ہوگا۔

اسرائیلی قابض فوج نے شیخ علی عبدالرب کو قبطیہ ٹاون جنین میں ان کے گھر سے ماہ اپریل میں اغوا کیا تھا۔ ان کومحض چند ماہ پہلے ہی اسرائیلی جیل سے سات ماہ کی نظر بندی کے بعد رہائی ملی تھی۔

شیخ علی عبدالرب پہلے تقریبا بیس سال اسرائیلی قید میں رہ چکے ہیں۔ 1992 میں انہیں اسرائیلی عدالت نے حماس کے ساتھ وابستگی کے جرم میں 19 سال کی سزائے قید سنائی تھی۔