فلسطین کے سابق نائب وزیر اعظم ڈاکٹر ناصر الدین الشاعر پر قاتلانہ حملہ

شیعیت نیوز: فلسطین کے سابق نائب وزیر اعظم ڈاکٹر ناصر الدین الشاعر پر غرب اردن میں قاتلانہ حملہ ہوا جس میں وہ بال بال بچ گئے۔

خبر رساں ایجنسی شہاب کی رپورٹ کے مطابق فلسطین کے سابق نائب وزیر اعظم ڈاکٹر ناصر الدین الشاعر پر گزشتہ روز غرب اردن میں قاتلانہ حملہ ہوا تاہم اس میں وہ بال بال بچ گئے۔ اس حملے میں ان کی ٹانگ میں گولی لگی اور انہیں ہسپتال منتقل کیا گیا جہاں ڈاکٹروں نے ان کی حالت تسلی بخش قرار دی۔

ڈاکٹر ناصر الدین الشاعر کا شمار حماس کے اہم رہنماوں میں ہوتا ہے۔ حماس نے ڈاکٹر ناصر الدین الشاعر پر قاتلانہ حملے کی مذمت کرتے ہوئے واقعہ کی تحقیقات اور جارحیت کرنے والوں کی گرفتاری کا مطالبہ کیا۔

حماس کے سیاسی دفتر کے سربراہ اسماعیل ہنیہ نے ڈاکٹر ناصر الدین الشاعر کو ٹیلی فون کر کے ان کی خیریت دریافت کی اور ان پر قاتلانہ حملہ کی مذمت کی۔

جمعے کے روز اسلامی مزاحمتی تحریک حماس کے سیاسی بیورو کے سربراہ اسماعیل ھنیہ نے سابق نائب وزیر اعظم ڈاکٹر ناصر الدین الشاعر کو فون کرکے ان کی خیریت دریافت کی اور ان کے ساتھ مکمل یکجہتی کا اظہار کیا۔

یہ بھی پڑھیں : جنوبی لبنان میں صیہونی فضائیہ کا ڈرون گر کر تباہ

اسماعیل ھنیہ نے فون پر بات کرتے ہوئے اس حملے کو ’غدارانہ جرم‘ قرار دیتے ہوئے اس کی مذمت کی۔

ان کا کہنا تھاکہ کسی فلسطینی شخصیت کو اس طرح نشانہ بنانا فلسطینی قوم کی نہیں بلکہ قابض دشمن کی خدمت کرنا ہے۔

ہنیہ نے فلسطینی اتھارٹی اور صدر محمود عباس سے ’’ذاتی طور پر‘‘ مطالبہ کیا کہ وہ اس کیس میں ملوث افراد کا سراغ لگانے اور ٹرائل کرنے کے لیے فوری اقدامات کرائیں۔ ان کا کہنا تھا کہ تمام فلسطینی اس گھناؤنے جرم پر شدید غصے کی حالت میں ہیں۔

حماس کے سربراہ نے اس مجرمانہ رویے کے خطرے کے خلاف خبردار کیا، جو کہ ایک عظیم قومی مصیبت بن کر ابھر رہا ہے۔ انہوں نے کہا کہ اس طرح کے جرائم فلسطینی قوم  اور قیادت کو حق کی آواز بلند کرنے سے نہیں روک سکتے۔

جمعہ کو مسلح افراد نے سابق فلسطینی وزیر اعظم پر اس وقت فائرنگ کی جب وہ نابلس کے جنوب میں واقع گاؤں کفر قلیل میں تھے۔ فائرنگ سے ان کی ٹانگوں میں چھ گولیاں لگی ہیں۔

چند ہفتے قبل الشاعر کو النجاہ نیشنل یونیورسٹی کے گارڈز اور سکیورٹی عملےکے ارکان نے مارا پیٹا اور حملہ کیا۔