حکومت کالعدم تنظیموں تکفیری گروہوں اور دھشت گردوں کے نیٹ ورک کا مکمل خاتمہ کر کے ملک میں دیرپا امن قائم کر سکتی ہے، علامہ مقصود ڈومکی

شیعیت نیوز: مجلس وحدت مسلمین پاکستان کے مرکزی سیکرٹری امورتنظیم سازی علامہ مقصود علی ڈومکی نے عید کے تیسرے دن ایک وفد کے ہمراہ شہدائے مچھ کے خانوادے سے ملاقات کی۔ اس موقع پر ان کے ہمراہ ایم ڈبلیو ایم کے صوبائی رہنما آغا سہیل اکبر شیرازی مولانا حیدر علی بلوچ و دیگر ان کے ہمراہ تھے۔

اس موقع پر گفتگو کرتے ہوئے مقصود علی ڈومکی نے کہا کہ شہداء محفل انسانی کی شمع ہیں جنہوں نے اپنے لہو کا نذرانہ دے کر محفل انسانی کو منور کیا۔ شہداء اور ان کے ورثاء کی قربانی کو قوم خراج عقیدت پیش کرتی ہے۔انہوں نے کہا کہ شہداء سانحہ مچھ کی مظلومانہ شہادت نے قوم میں بیداری کی لہر پیدا کی۔ سانحہ مچھ کے دھرنے کے موقع پر حکومت نے جو وعدے کئے وہ اب تک پورے نہیں ہوئے۔

یہ بھی پڑھیں: ایم ڈبلیوایم نے ضمنی انتخاب پی پی 90 دریا خان بھکر میں پی ٹی آئی امیدوارکی حمایت کا اعلان کردیا

انہوں نے کہا کہ حکومت کالعدم تنظیموں تکفیری گروہوں اور دھشت گردوں کے نیٹ ورک کا مکمل خاتمہ کر کے ملک میں دیرپا امن قائم کر سکتی ہے۔ اسی ہزار شہداء کے پاکیزہ لہو سے انصاف تبھی ممکن ہے جب قاتل دھشت گردوں کو نشان عبرت بنایا جائے۔ ملک بھر میں شہداء کے قبرستان یزیدی دھشت گردوں کی سفاکیت کی علامت ہیں اور اس بات کی دلیل ہیں کہ ہم نے دین اسلام کی سربلندی اور وطن کی محبت میں لازوال قربانیاں دی ہیں۔