اسرائیلی حکومت کی بنیادی تنصیبات پر بڑا سائبر حملہ
شیعیت نیوز: اسرائیلی حکومت کی بنیادی تنصیبات کو ایک بار پھر سائبر حملے کا نشانہ بنایا گیا ہے۔
اسرائیلی حکومت کی بنیادی تنصیبات پر مختلف گروہوں کے سائبر حملے اور اس کی بنیادی اطلاعات تک رسائی نے اس حکومت کی سائبر ترقی کا بھرم چکنا چور کر دیا ہے۔
صابرین نیوز نے جمعرات کو اسرائیلی حکومت کی بنیادی تنصیبات پر ایک عراقی ٹیم کے زبردست سائبر حملے اور تل ابیب کی شیئر مارکیٹ پوری طرح ہیک کر لینے کی خبر دی ہے۔
رپورٹ کے مطابق اسرائیلی حکومت کی شیئر مارکیٹ کا پورا سسٹم دسترس سے خارج ہو گیا ہے۔
اب تک کئی بار اسرائیلی حکومت کے سرور اور اس کی ویب سائٹوں کو عراق سے سائبر حملے کا نشانہ بنایا جا چکا ہے۔
اس سے قبل عراق کی الطاہرہ نامی سائبر ٹیم جاں نثاران ابومہدی المہندس کے نعرے سے صیہونی حکومت کے نقل و حمل کے نظام کو وسیع حملے کا نشانہ بنا چکی ہے جس سے اسرائیلی حکومت کی سب سے بڑی نقل و حمل کمپنی کا پورا نظام ٹھپ ہو کر رہ گیا۔
یہ بھی پڑھیں : عراق، اربیل ڈرون حملے میں موساد کے قاتل دستے کا کمانڈر ہلاک
دوسری جانب اسرائیلی حکومت کے وزیراعظم نے اعتراف کیا ہے کہ اب وہ اپنی حکومت کو گرنے سے نہیں بچا سکتے
اسرائیلی حکومت کے وزیر اعظم نفتالی بینٹ نے بدھ کو اکونومیسٹ کو انٹرویو دیتے ہوئے کہا کہ ان کی پارٹی کا اتحاد بکھر رہا ہے، اس نے کینسٹ میں اکثریت کھو دی ہے اور اس کے اراکین کے درمیان بہت کم موضوعات پر اتفاق باقی رہ گیا ہے۔
نفتالی بنیٹ نے اعتراف کیا کہ وہ اپنی حکومت کا شیرازہ بکھرنے سے روکنے کے لئے کچھ نہیں کر پا رہے ہیں۔ انھوں نے اپنے اتحادیوں سے کہا کہ اس سے زیادہ افرا تفری پیدا نہ کریں۔
اسرائیلی وزیر اعظم نے دعویٰ کیا کہ وہ چاہتے ہیں کہ اپنے ایٹمی پروگرام میں ایران پر سبقت حاصل کر لیں اور ٹیکنالوجی کے لحاظ سے ایران پر برتری برقرار رکھیں۔
اسرائیلی حکومت کے ٹی وی چینل سیون نے سابق اسرائیلی وزیر دانی دنون اور لیکوڈ پارٹی کے حوالے سے کہا کہ نفتالی بینٹ کی کابینہ حالیہ سیاسی حالات کی بنا پر ایک کمزور و ناتواں کابینہ ہے۔ دنون نے کہا کہ اسرائیلی حکومت کی موجودہ کابینہ تمام مسائل کے بارے میں کمزور موقف کی بنا پر منحل ہونے کی دہلیز پر پہنچ گئی ہے۔
اسرائیلی حکومت کے سیکورٹی اور انٹیلیجنس حکام میں بھی حکومت کا شیرازہ بکھرنے کو لے کر تشویش ہے اور بعض اسرائیلی حکام نے اس سلسلے میں مختلف مواقع پر انتباہ بھی دیا ہے۔
