عراق، حشد الشعبی کا ملک کو داعشیوں سے پاک کرنے کے لیے نیا سیکورٹی آپریشن شروع

شیعیت نیوز: عراقی رضاکار فورس حشد الشعبی نے صوبہ صلاح الدین میں داعش کی باقیات کے خلاف نیا سیکورٹی آپریشن شروع کیا ہے۔

حشد الشعبی نے صوبہ صلاح الدین کے مشرق میں دہشت گرد گروہ داعش کے ٹھکانوں کی تلاش کے لیے مشترکہ آپریشن کا اعلان کیا ہے۔

فارس نیوز ایجنسی کے مطابق، حشد الشعبی اور عراقی پولیس فورسز نے پیر کو مشرقی شہر الدور میں ایک سیکورٹی آپریشن شروع کیا۔

خبر رساں ادارے واع کی رپورٹ کے مطابق حشد الشعبی کے بیان میں کہا گیا ہے کہ مشترکہ پولیس فورس اور حشد الشعبی نے الدور شہر میں داعش دہشت گرد گروہ کے خفیہ ٹھکانوں اور اڈوں کی تلاش کے لیے سرچ آپریشن شروع کیا۔

بیان میں مزید زور دیا گیا کہ آپریشن کا مقصد علاقے میں داعش کے ٹھکانوں کو ختم کرنا ہے۔

اس سلسلے میں عراقی انٹیلیجنس سروس نے اتوار کو بغداد میں دہشت گرد گروہ داعش کے خلاف بڑے پیمانے پر آپریشن شروع کرنے کا اعلان کیا ہے۔

یہ بھی پڑھیں : ایران سعودی عرب مذاکرات ترقی کے مراحل میں پہنچ گئے ہیں، مصطفیٰ الکاظمی

اس عراقی ادارے نے ایک بیان میں کہا ہے کہ وہ داعش کے خلاف جنگ اور داعش کے عناصر کے تعاقب میں عراقی وزارت داخلہ میں فیڈرل انٹیلی جنس اینڈ انویسٹی گیشن سروس کی کامیابیوں کے مطابق بغداد میں کارروائیاں کر رہے ہیں۔

المعلومہ نیوز ویب سائٹ نے بیان کے حوالے سے بتایا ہے کہ آپریشن کے دوران کئی سرغنوں سمیت 14 دہشت گردوں کو گرفتار کیا گیا۔

عراقی انٹیلی جنس سروس کے مطابق حراست میں لیے گئے افراد میں ابو سفانہ، ابو عمر اور ابو مصعب جیسے داعش کے سرغنے شامل ہیں۔ ان افراد کو متعدد آپریشن کے دوران گرفتار کیا گیا ہے۔

دوسری جانب عراقی ذرائع کا کہنا ہے کہ منگل کی علی الصبح شمالی بغداد کے علاقے الطارمیہ میں عراق کی عوامی رضا کار فورس حشد الشعبی کے جوانوں کی داعش دہشت گردوں کے ساتھ جھڑپیں ہوئیں۔

صابرین نیوز کی رپورٹ کے مطابق منگل کی علی الصبح شمالی بغداد کے علاقے الطارمیہ میں عراق کی عوامی رضا کار فورس حشد الشعبی کے جوانوں کی دہشتگردوں کے ساتھ ہونے والی جھڑپ میں داعش کے 12 دہشت گرد ہلاک ہوئے۔