یمن کا قومی مستقبل مسلسل درخشاں ہوتا جائے گا، یمنی اعلی سیاسی کونسل

شیعیت نیوز: یمن کی اعلی سیاسی کونسل کے سربراہ نے امید ظاہر کی ہے کہ یمن کا قومی مستقبل مسلسل درخشاں ہوتا جائے گا۔

فارس خبر رساں ایجنسی کی رپورٹ کے مطابق یمن کی اعلی سیاسی کونسل کے سربراہ مہدی المشاط نے یمنی عوام پر سعودی اتحاد کی مسلط کردہ جنگ کے بعد ہونے والی فائر بندی کے تناظر میں یمن کی تعمیرنو کے عمل کے بارے میں کہا ہے کہ ہم ہر شعبے میں تعمیرنو اور ترقی کا عمل تیز کرنا چاہتے ہیں اور سخت ترین حالات میں بھی یمن کے مختلف صوبوں میں مسائل و مشکلات پر قابو پانے کی کوشش کی جا رہی ہے۔

انھوں نے کہا کہ یمن میں قومی مستقبل کے منصوبے پر عمل شروع کیا گیا ہے اور ہمیں امید ہے کہ اس منصوبے کو آگے بڑھانے میں ہم کامیاب رہیں گے۔

واضح رہے کہ یمن میں سعودی عرب اور اس کے اتحادیوں کی جنگ و جارحیت کے نتیجے میں اب تک لاکھوں یمنی شہری شہید اور زخمی ہوچکے ہیں جبکہ چالیس لاکھ سے زیادہ یمنی شہری بے گھر اور در بدر ہوچکے ہیں۔

یہ بھی پڑھیں : سعودی حکومت صنعا ایئرپورٹ کھولے جانے کی راہ میں رکاوٹ ڈال رہی ہے، علی القحوم

سعودی عرب کی جنگی جارحیت کے نتیجے میں یمن کی پچاسی فیصد سے زیادہ بنیادی ڈھانچے تباہ و برباد ہوچکے ہیں اور اس ملک کو غذائی اشیا اور دواؤں کی شدید قلت کا سامنا ہے۔

یہ ایسی حالت میں ہے کہ یمنی عوام کے خلاف جنگ و جارحیت کے گذشتہ سات برسوں کے دوران یمنی مسلح افواج کی جوابی کارروائیوں میں خود سعودی اتحاد کو بھی بھاری نقصان پہنچا ہے۔

دوسری جانب یمن کی اسلامی تنظيم انصار اللہ کے ترجمان محمد عبدالسلام نے اعلان کیا ہے کہ اقوام متحدہ کے جنگ بندی معاہدے کی خلاف ورزی جاری رہنے کی صورت میں سعودی عرب اور امارت کو منہ توڑ جواب دیا جائےگا۔

انھوں نے کہا کہ یمنی فوج اور قبائل سعودی عرب اور امارات کی جارحیت کا مکمل طور پر مقابلہ کرنے کے لئے آمادہ ہیں۔ ذرائع کے مطابق یمن ميں اقوام متحدہ کی طرف سے جنگ بندی کے معاہدے کی سعودی عرب کی طرف سے مسلسل خلاف ورزی کی جارہی ہے۔