الاقصیٰ میں دشمن کے ناپاک عزائم ناکام بنا رہے ہیں، اسماعیل ھنیہ

شیعیت نیوز: اسلامی مزاحمتی تحریک حماس کے سیاسی بیورو کے سربراہ اسماعیل ھنیہ نے مسجد اقصیٰ کے خلاف دشمن کے تمام منصوبوں اور ناپاک عزائم کو ناکام بنانے کےعزم کا اعادہ کیا ہے۔

اسماعیل ھنیہ نے منگل کی رات عالمی یوم قدس کے موقع پر ایک تقریر میں خبردار کیا کہ ’’مسجد اقصیٰ میں دشمن کی حد سے تجاوز کرنے اور مزید حماقتیں کرنے کی کوششیں دو طرفہ تنازعہ کو علاقائی تنازع میں بدل سکتی ہیں۔‘‘

انہوں نے زور دے کر کہا کہ اگر دشمن اپنی حدود سے تجاوز کرتا ہے اور قبلہ اول سے چھیڑ چھاڑ سے بازنہیں آتا تو غزہ جنگ سے دور نہیں رہ سکتا۔

حماس کے سربراہ اسماعیل ہنیہ نے اپنے خطاب میں کہا کہ قدس، مسجد الاقصی اور فلسطینیوں کی آزادی کے مسائل مذاکرات کی میز پر حل ہونے والے نہیں ہیں۔

یہ بھی پڑھیں : اسرائیلی فوج کی فائرنگ سے فلسطینی لڑکا احمد مساد شہید، تین زخمی

اسماعیل ہنیہ نے اس بات کی طرف اشارہ کیا کہ فلسطینی عوام کے مرابطین، مرابطات، مقبوضہ اندرونی علاقوں کے فلسطینیوں اور غزہ میں حمایت کی طاقت نے قبلہ اول پر صہیونی جارحیت کے ناپاک عزائم کو ناکام بنا دیا۔

انہوں نے کہا کہ یوم قدس نسلوں کی یاد میں ایک لافانی دن بن گیا ہے۔ اسماعیل ھنیہ نے خبردار کیا کہ رمضان المبارک کے آغاز میں اسرائیل پر ہونے والے فلسطینی فدائی حملے آخری نہیں تھے۔ اس طرح کی کارروائیاں مزید ہوسکتی ہیں۔ ان فدائی حملہ آوروں کا کسی گروپ کے ساتھ کوئی تعلق نہیں تھا جس سے ظاہر ہوتا ہے کہ فلسطینی مزاحمت کسی ایک جماعت تک محدود نہیں بلکہ یہ پوری فلسطینی قوم کا فیصلہ ہے۔

انہوں نے کہا کہ عالمی یوم القدس نے اب ایک نئی شکل اختیار کی ہے اور یہ ایک عظیم تحریک میں بدل گئی ہے۔

اسماعیل ہنیہ نے غرب اردن اور مقبوضہ علاقوں میں فلسطینیوں کی جانب سے شہادت پسندانہ کارروائیوں کی جانب اشارہ کرتے ہوئے کہا کہ اس قسم کی کارروائیوں کی اہمیت اس میں ہے کہ فلسطینی عوام نے استقامت کے راستے کا انتخاب کیا اور یہ مسجد الاقصی میں نماز کی ادائیگی اور ہماری آزادی کیلئے اہم انتخاب ہے۔

انہوں نے کہا کہ فلسطینی عوام نے گزشتہ کئی روز کے دوران ہر جگہ اسرائیل کے مذموم مقاصد اور سازشوں کو ناکام بنا دیا ہے۔