ڈھائی ہزارامریکی فوجیوں کی عراق میں مزید تعیناتی کا اعلان مقدس اسلامی سر زمین پر غاصبانہ قبضے کے استکباری منصوبے کا تسلسل ہے، علامہ مقصود ڈومکی

شیعیت نیوز: امامیہ اسٹوڈنٹس آرگنائزیشن پاکستان یونٹ جیکب آباد کے زیر اہتمام اسٹار اکیڈمی جیکب آباد میں درسی نشست منعقد ہوئی۔ درسی نشست سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے سورہ والعصر کے ذیل میں گفتگو اور حالات حاضرہ پر روشنی ڈالی۔

انہوں نے کہا کہ انسان خسارے اور نقصان میں ہے سوائے ان لوگوں کے جو ایمان لائے اور نیک عمل انجام دیئے اور ایک دوسرے کو حق اور صبر کی تلقین کرتے رہے۔ سیدھے راستے پر چلنے کے لئے اھل حق کو ہمیشہ تلقین اور نصیحت کی ضرورت ہوتی ہے۔ حق اور صبر کی یادآوری اھل حق کی استقامت کا سبب بنتی ہے۔

یہ بھی پڑھیں: قوم ہم پر اعتماد رکھے ہدایت خلجی اور اسکے ساتھیوں کو سزاضرور دلوائیں گے، ارباب لیاقت ہزارہ

انہوں نے کہا کہ امریکی جنرل مکنزی کی جانب سے ڈھائی ہزار فوجیوں کی عراق میں مزید تعیناتی کا اعلان عراق کی مقدس اسلامی سر زمین پر غاصبانہ قبضے کے استکباری منصوبے کا تسلسل ہے جبکہ عراقی عوام اور پارلیمنٹ غاصب امریکی افواج سے سرزمین عراق کے انخلاء کا مطالبہ کر چکے ہیں۔ دسیوں لاکھ عراقی عوام نے ملینز مارچ کر کے امریکہ کے غاصبانہ قبضے سے اپنی نفرت کا اظہار کیا مگر امریکہ اپنے استکباری روئیے کے باعث اقوام عالم کی سوچ مطالبات اور مفادات کو پامال کرتا رہا ہے۔