عراق کو قابو کرنے کیلئے اسرائیلیوں کے ساتھ سازباز کا زمانہ گزر چکا، ابو علی العسکری

شیعیت نیوز: عراقی سرکاری افواج میں شامل عوامی مزاحمتی فورس کتائب حزب اللہ کے سکیورٹی کمانڈر ابو علی العسکری نے عراق میں مسلم دشمن عالمی طاقتوں کی نت نئی سازشوں کے حوالے سے میڈیا کے ساتھ گفتگو میں اعلان کیا ہے کہ عراق میں اب کبھی آمریت کامیاب نہ ہو پائے گئی۔

فارس نیوز کے مطابق ابو علی العسکری نے تمام سازشی عناصر کو متنبہ کرتے ہوئے تاکید کی ہے کہ عراق آمریت، ظلم و ستم اور مقدس مقامات و انسانی وقار کی توہین کے زمانے میں اب کبھی نہ پلٹے گا اور وہ دور گزر گیا جب عراق کو قابو میں لانے کے لئے برطانویوں، خلیج فارس کے عربوں یا ان کے پیچھے موجود اسرائیلیوں کے ساتھ سازباز کی جاتی تھی۔

انہوں نے کہا کہ سبھی کو جان لینا چاہئے کہ اب طاقت کا توازن بدل چکا ہے جبکہ ملک عزیز حشد الشعبی اور عراقی مزاحمتی محاذ کے بدولت اب کبھی اس تاریک دور میں واپس نہ پلٹے گا۔

یہ بھی پڑھیں : شام، امریکی اتحادی کرد ملیشیا نے 700 داعشی دہشت گردوںکو رہا کرنے کا فیصلہ کر لیا

عرب چینل المیادین کے مطابق اسی حوالے سے کتائب حزب اللہ کے سیکرٹری جنرل ابو حسن الحميداوی نے بھی عراق کے لئے اقوام متحدہ کی خصوصی نمائندہ جینن ہینس پلاسچرٹ کے حالیہ مداخلت آمیز اقدامات کی جانب اشارہ کرتے ہوئے تاکید کی ہے کہ عراق کو موجودہ حالت میں پہنچانے کے لئے سرتوڑ کوشش کرنے والے ممالک اور تنظیموں کے لئے ہمارا پیغام یہ ہے کہ ’’تم سب دھاندلی اور عراقی قوم کے ارادے پر ڈاکہ ڈالنے والے اندرونی خیانت کاروں کے ساتھ برابر کے شریک ہو جبکہ عراقی قوم کے موثر حلقے کو میدان سے غائب کر دینے سے متعلق تمہارے تمام حساب کتاب دھرے کے دھرے رہ جائیں گے‘‘۔

ابو حسن الحميداوی نے اپنی گفتگو کے آخر میں خبردار کرتے ہوئے کہا کہ عراق میں خانہ جنگی کے شعلوں کو ہوا دینے کے اقدامات خود امریکہ، سعودی شاہی حکومت اور غاصب صیہونی ریاست کو آگ میں لا جھونکیں گے۔