فیس بک نوجوانوں کی ذہنی صحت کو بری طرح متاثر کر رہی ہے، فرانسس ہاؤگن
شیعیت نیوز: فیس بک کی مصنوعات بچوں اور جمہوریت کے لیے نقصان دہ ہیں، یہ بات خود فیس بک کی ایک سابق عہدیدار فرانسس ہاؤگن نے امریکی سینیٹ میں کہی ہے۔
فرانسس ہاؤگن نے امریکی سینیٹ کی کمیٹی کے سامنے بیان دیتے ہوئے کہا ہے کہ فیس بک کی انتظامیہ کو معلوم ہے کہ پلیٹ فارم کو کیسے محفوظ بنایا جا سکتا ہے لیکن وہ اپنے مفادات کی خاطر ایسا کرنے سے گریزاں ہے۔
اُدھر فیس بک کا کہنا ہے کہ فرانسس ہاؤگن جن موضوعات پر بات کر رہی ہیں، وہ ان سے بے خبر ہے۔
یہ بھی پڑھیں : کالعدم سپاہ صحابہ آپے سے باہر، گلگت بلتستان میں بھی توہین صحابہ کی جھوٹی الزام تراشیوں کا آغاز
خیال رہے کہ فیس بک دنیا کا سب سے بڑا سوشل میڈیا پلیٹ فارم مانا جاتا ہے اور کمپنی کا دعویٰ ہے کہ ان کے ماہانہ سرگرم صارفین کی تعداد دو اعشاریہ سات ارب ہے جبکہ کروڑوں دیگر فیس بک کے دیگر پلیٹ فارم واٹس ایپ اور انسٹاگرام بھی استعمال کرتے ہیں۔
فیس بک کو شدید تنقیدوں کا سامنا رہا ہے اور اس پر الزام ہے کہ اس نے صارفین کا ڈیٹا چوری کرنے اور غلط معلومات کو پھیلانے میں اہم کردار ادا کیا ہے۔
قابل ذکر ہے کہ منگل کے روز ہونے والے امریکی سینٹ کے اجلاس میں ملک کی دونوں سیاسی جماعتوں ڈیموکریٹک پارٹی اور ریپبلکن پارٹی کے اراکین اس بات پر متفق نظر آئے کہ کمپنی میں تبدیلی کی ضرورت ہے۔
یاد رہے کہ تعلیم و تربیت کے ماہرین سوشل میڈیا اور بالخصوص فیس بک کے بچوں پر پڑنے والے برے اثرات کی بابت انتباہات دے چکے ہیں اور ان کا ماننا ہے کہ مختلف اخلاقی و سماجی خطرات سے بچوں کو محفوظ رکھنے کے لئے ان کے والدین یا سرپرستوں کا سوشل میڈیا اور انٹرنیٹ پر انکی سرگرمیوں پر نظر رکھنا ایک لازمی امر ہے۔
