صیہونی دشمن کے خلاف جہاد نماز کی طرح واجب ہے، اسلامی جہاد فلسطین

شیعیت نیوز: اسلامی جہاد فلسطین کے سیکرٹری جنرل زیاد النخالہ کہا ہے کہ اسرائیل کے ساتھ دوستی کرنے اور دشمن کے ساتھ تعلقات استوار کرنے والے ممالک فلسطینی قوم کے ساتھ غداری کے مرتکب ہو رہے ہیں۔

رپورٹ کے مطابق اسلامی جہاد فلسطین کے سیکرٹری جنرل نے جماعت کے 34 ویں یوم تاسیس کے موقعے پر فلسطینی قوم کےنام اپنے پیغام میں کہا کہ فلسطینی اور پورے خطے کے مسلمان اور عرب ممالک کو قابض دشمن کے خلاف متحد ہونا چاہیے اور فلسطینی قوم کی وحدت کو برقرار رکھنے کے لیے مستقل رابطہ برقرار رکھنا چاہیے۔

انہوں نے کہا کہ اس صیہونی دشمن کے خلاف مسلح جدوجہد نماز کی طرح ہر قسم کے حالات میں واجب ہے، کیونکہ ہمارے اور ہماری قوم کے سامنے صرف دو ہی راستے ہیں؛ یا تو عزت اور وقار کے ساتھ زندگی گزاریں یا ذلت اور خواری کی حالت میں زندہ رہیں۔

زیاد النخالہ نے کہا کہ شمشیر قدس معرکے نے غاصب صیہونی حکومت کی کھوکھلی طاقت کا بھانڈا پھوڑ دیا ہے۔ انہوں نے کہا کہ اس معرکے نے فلسطینی عوام میں امید کی کرن زندہ کر دی ہے اور وہ جان چکے ہیں کہ قابض قوتوں کے خلاف فتح ممکن ہے۔

یہ بھی پڑھیں : بعض مزید عرب ممالک کے ساتھ بھی در پردہ تعلقات ہیں، یائیر لبید

اسلامی جہاد فلسطین کے سیکرٹری جنرل نے کہا کہ ہم اگر آزادی اور فتح کا نعرہ بلند کر رہے ہیں تو اس کی وجہ ہماری خود اعتمادی ہے۔ ہمیں اپنے اوپر اعتماد ہے کہ ہم گذشتہ سے زیادہ طاقتور اور زیادہ ہوشیار ہوچکے ہیں اور سر دھڑ کی بازی لگانے کیلئے زیادہ تیار ہیں۔

زیاد النخالہ نے کہا کہ اس مقدس سرزمین پر یا تو ہم زندگی بسر کریں گے یا ہمارا دشمن رہے گا اور تاریخ اس بات کی گواہی دے گی کہ شکست یہودیوں کا مقدر بنی تھی۔

انہوں نے فلسطین اور خطے میں اسلامی مزاحمتی قوتوں کے درمیان باہمی اتحاد پر زور دیا اور کہا کہ یہ اتحاد ہمیشہ کی بنیادوں پر باہمی رابطے اور تعاون سے معرض وجود میں آسکتا ہے۔

اسلامی جہاد فلسطین کے سیکرٹری جنرل نے ایک بار پھر غاصب صیہونی حکومت کے ساتھ مذاکرات اور ساز باز کی پالیسی کو مسترد کرتے ہوئے کہا کہ فلسطینی عوام، سرزمین اور اسلامی مقدسات کے نام پر صیہونی دشمن سے ساز باز ناقابل قبول ہے۔

زیاد النخالہ نے غاصب صیہونی حکومت کی جیلوں میں قید فلسطینی شہریوں اور رہنماوں کا ذکر کرتے ہوئے کہا کہ ہم ان پر درود بھیجتے ہیں اور ان کی عظمت کو سلام پیش کرتے ہیں۔

انہوں نے کہا کہ جلبوع میں واقع صیہونی جیل سے چند فلسطینی قیدیوں کا کامیاب فرار اور اس مسئلے میں عوام کی حمایت نیز غزہ کی پٹی میں فلسطینی شہریوں کی شہادت سے ظاہر ہوتا ہے کہ یہ سرزمین اور قدس شریف فلسطینیوں کا ہے اور ہمارا دشمن نابود ہوتا جا رہا ہے۔ ہمیں دشمن کے مقابلے میں مسلسل اور شدید مزاحمت کا مظاہرہ کرنا ہوگا۔

اسلامی جہاد فلسطین کے سیکرٹری جنرل نے کہا کہ صیہونی حکمران عرب دنیا میں کئی محاذوں پر آگے بڑھنے کی کوشش میں مصروف ہیں۔ افسوسناک امر یہ ہے کہ بعض عرب ممالک میں غاصب صیہونی حکومت کا اثر و رسوخ اتنی تیزی سے پھیل رہا ہے کہ اس کی توقع خود صیہونی حکمران بھی نہیں کر رہے تھے۔