افغانستان کی تازہ ترین صورتحال پر عالمی سفارت کاری کا سلسلہ جاری

شیعیت نیوز: ایران، پاکستان، چین اور روس کے اعلیٰ سفارت کاروں نےشنگھائی سربراہی اجلاس کی سائڈ لائن پر افغانستان کی تازہ ترین صورتحال کے سلسلے میں ملاقات اور گفتگو کی ہے۔

اطلاعات کے مطابق تاجکستان کے دارالحکومت دوشنبہ میں ہوئی اس ملاقات اور گفتگو میں ایران کے وزیر خارجہ کے مشیر سید رسول موسوی، پاکستان کے وزیر خارجہ شاہ محمود قریشی، چین کے وزیر خارجہ وانگ یی اور روس کے وزیر خارجہ سرگئی لاوروف شریک ہوئے۔

پاکستان کے دفتر خارجہ نے ایک بیان جاری کرکے یہ اعلان کیا ہے کہ مذکورہ چار ممالک کے اعلیٰ سفارت کاروں نے افغانستان کی تازہ ترین صورتحال اور علاقائی امن و استحکام کی صورتحال پر تبادلہ خیال کیا۔

چاروں ممالک نے اس بات پر زور دیا کہ افغانستان میں سیاسی و قومی مفادات کے حصول کے لئے تمام گروہوں کی شمولیت کے ساتھ ایک جامع اور وسیع البنیاد حکومت کی تشکیل ناگزیر ہے۔

یہ بھی پڑھیں : عراق سے امریکہ کے دہشت گرد فوجی جلد ہی نکل جائیں گے، بدر الزایدی

ایران، پاکستان، چین اور روس کے سفارت کاروں نے افغانستان میں پھیلی افراتفری کے نتیجے میں ممکنہ طور پر پیدا ہونے والے دہشت گردی کے خطرات اور منشیات کی اسمگلنگ کا مل کر مقابلہ کرنے پر بھی زور دیا۔

یاد رہے کہ طالبان نے پندرہ اگست کو افغانستان میں اقتدار پر قبضہ کر کے اسکے تین ہفتے بعد عبوری حکومت کی کابینہ کا اعلان کر دیا تھا۔

دوسری جانب تاجکستان کے دارالحکومت دوشنبہ میں ایران کے صدر سید ابراہیم رئیسی کی موجودگی میں شنگھائی تعاون تنظیم کے 21ویں سربراہی اجلاس کا آغاز ہوگيا ہے۔ شنگھائی تعاون تنظیم کے سربراہی اجلاس میں 12 ممالک رکن اور مبصر کی حیثیت سے شریک ہیں۔

اطلاعات کے مطابق اس اجلاس میں میزبان تاجکستان کے صدر کے علاوہ قزاقستان، قرقیزستان، بیلاروس، پاکستان، ترکمنستان ازبکستان کے سربراہ موجود ہیں جبکہ روس ، چين،بھارت اورمنگولیا کے سربراہ اس اجلاس میں آن لائن شریک ہیں۔ ایران کے صدر اس اجلاس سے خطاب کریں گے ۔