اتحاد اُمت فورم نے توہین اہل بیتؑ کیخلاف جمعہ 9 جولائی کویوم احتجاج منانے کا اعلان کر دیا

شیعیت نیوز: اتحاد اُمت فورم نے توہین اہلبیت کیخلاف جمعہ 9 جولائی یوم احتجاج منانے کا اعلان کر دیا۔ اتحاد امت فورم میں شیعہ علماء کونسل، مجلس وحدت مسلمین، جامعتہ المنتظر کے علماء اور دیگر شیعہ تنظیمیں شامل ہیں۔ لاہور پریس کلب میں علامہ سبطین سبزواری، علامہ حسن رضا ہمدانی، علامہ امجد علی عابدی، حافظ کاظم رضا نقوی سمیت دیگر رہنماوں کے ہمراہ پریس کانفرنس میں کہا کہ اتحادِ اُمت فورم توہین اہلبیت پر تشویش کا اظہار کرتا ہے، اور ہم 9 جولائی بروز جمعہ کو ملک بھر میں یوم احتجاج منائیں گے، ملک بھر میں نماز جمعہ کے بعد احتجاجی مظاہرے کئے جائیں گے۔

انہوں نے کہا کہ امام موسی کاظمؑ، امام محمد تقیؑ، امام علی نقیؑ تمام اسلامی مکاتب فکر کے نزدیک قابل احترام شخصیات ہیں، عبدالرحمن سلفی نامی شخص نے مقدس شخصیات کی توہین کی ہے جس سے پوری امت کے جذبات مجروح ہوئے ہیں۔ انہوں نے کہا کہ ملزم کو گرفتار کر کے قرار واقعی سزا دی جائے۔

یہ بھی پڑھیں: 6جولائی 1980،شیعہ قوم نے یہ ثابت کیا کہ اگر وہ اپنے اصولی موقف پر ڈٹ جائیں تو دنیا کی کوئی طاقت انہیں ایک انچ بھی پیچھے نہیں ہٹا سکتی، علامہ راجہ ناصرعباس

علامہ سبطین سبزواری نے کہا کہ اہلسنت علماء کی طرف سے ملزم سے اظہار لاتعلقی اور مذمتی بیانات قابل تحسین ہیں، جس پر ہم اہلسنت علماء کے شکر گزار ہیں۔ انہوں نے کہا کہ شرپسند عناصر ملک میں 1980 اور 1990 کی دہائیوں کی طرز پر فرقہ واریت پھیلانا چاہتے ہیں۔ انہوں نے کہا کہ پاکستان میں توہین رسالت، توہین اہلبیت اور توہین صحابہ کرام کے واقعات ناقابل برداشت ہیں، کچھ لوگ دہشتگردوں کیخلاف فوجی آپریشن کے ثمرات کو ضائع کرنا چاہتے ہیں۔

انہوں نے کہا کہ مساجد میں آئمہ جمعہ و جماعت خطبات میں احتجاج کریں گے، اور نماز جمعہ کے بعد احتجاجی مظاہرے کئے جائیں گے۔ رہنماوں نے مطالبہ کیا کہ عزاداری کیخلاف سازشیں بند کی جائیں، فورتھ شیڈول میں بانیان مجالس کے نام شامل کرنے کا سلسلہ بھی بند کیا جائے۔ انہوں نے کہا کہ وسیم رضوی نامی ملعون بھارتی شہری کی طرف سے جہاد سے متعلق آیات نکال کر قرآن کی اشاعت کلام الٰہی پر حملہ ہے، اس بدبخت کا اسلام سے کوئی تعلق نہیں۔