علامہ راجہ ناصرعباس کی اپیل پر21مئی کویوم یکجہتی فلسطین کے طور پر منایا جائے گا،علامہ عبدالخالق اسدی
علامہ اسدی کا کہنا تھا کہ 21 مئی کو شہری اپنے گھروں سے نکلیں، احتجاجی مظاہروں میں شرکت کریں اور اسرائیل سے اپنی برات کا اظہار کریں۔
شیعیت نیوز: مجلس وحدت مسلمین پنجاب کے سیکرٹری جنرل علامہ عبدالخالق اسدی نے کہا ہے کہ 21 مئی کو بروز جمعہ یوم یکجہتی فلسطین کے طور پر منایا جائے گا اس حوالے سے قائد وحدت علامہ راجہ ناصر عباس کی ہدایت پر صوبے بھر میں ریلیاں نکالیں جائیں گی اور فلسطین کے مظلوم مسلمانوں کیساتھ اظہار یکجہتی کیا جائے گا۔
فلسطین میں جاری مسجد اقصی کے اسرائیلی محاصرے کی شدید ترین مذمت کرتے ہوئے علامہ اسدی نے کہا کہ فلسطینیوں کی خون آلود عیدالفطر عالمی برادری کے منہ پر طمانچہ ہے، نماز عبادات اور قیام و رکوع سجود میں خدا کے حضور جھکے انسانوں پر بے رحمانہ تشدد اور نہتے انسانوں کے درندگی کیساتھ قتل پر اقوام متحدہ اور او آئی سی کی خاموشی تاریخ کی انتہائی تلخ حقیقت ہے۔
یہ بھی پڑھیں: طاقت کے نشے میں مدہوش اسرائیل کے ہاتھ معصوم فلسطینی شہریوں کے خون سے رنگے ہوئے ہیں، وزیراعلیٰ پنجاب
انہوں نے کہا کہ پاکستان کا فلسطین کے بارے موقف ہمیشہ دو ٹوک اور حتمی رہا ہے اور ہم اُمید کرتے ہیں کہ حکمران اس موقف پر قائم رہیں گے۔ علامہ اسدی کا کہنا تھا کہ 21 مئی کو شہری اپنے گھروں سے نکلیں، احتجاجی مظاہروں میں شرکت کریں اور اسرائیل سے اپنی برات کا اظہار کریں۔
