ملک میں افراتفری کی صورتحال پر حکومت جمہوری انداز میں حکمت عملی اپنائے نہ کہ ڈکٹیٹر بننے کی کوشش کرے، علامہ اسدی

شیعیت نیوز: مجلس وحدت مسلمین پنجاب کے سیکرٹری جنرل علامہ عبدالخالق اسدی نے کہا ہے کہ نہتے شہریوں اور عاشقانِ رسول (ص) پر دن دہاڑے گولیاں برسانا کسی بھی زاویے سے جمہوری عمل نہیں ہے. لاہور میں پولیس کی فائرنگ سے قتل ہونے والوں کے ورثاء کو تعزیت پیش کرتا ہوں اس بہیمانہ قتل کی جتنی مذمت کی جائے کم ہے۔

انہوں نے کہا کہ ملک میں افراتفری کی صورتحال پر حکومت جمہوری انداز میں حکمت عملی اپنائے نہ کہ ڈکٹیٹر بننے کی کوشش کرے. معاملات غیر جمہوری انداز میں حل کرنے سے نہ ختم ہونے والے مسائل جنم لے رہے ہیں. تمام مکاتب فکر کے علماء سے درخواست کرتا ہوں ناموس رسالت کے معاملے پر سنجیدگی کا مظاہرہ کریں۔

یہ بھی پڑھیں: سکیورٹی اداروں کی اہم کاروائی، کالعدم تحریک طالبان کے 2خودکش حملہ آوروں سمیت 5 خطرناک دہشت گرد گرفتار

انہوں نے مزید کہا کہ ملک میں نا امنیت عالمی پاکستان و اسلام دشمنوں کا ذخیرہ ہے لہٰذا دشمنوں کیلئے موقع فراہم نہ ہونے پائے اور مل کر حکمت عملی مرتب کریں. ناموس محمد و آل محمد صل اللہ علیہ وآلہ وسلم پر تمام مکاتب فکر و مسالک یکجا ہو جائیں اور منظم انداز میں آئینی و قانونی تقاضوں کو ملحوظ خاطر رکھتے ہوئے پاکستان سے توہینِ رسالت کرنے والوں کے خلاف ایک عالمی تحریک کا آغاز کریں۔