یمنی تحریک انصار اللہ کا سعودی فضائیہ کے اڈے پر بارودی ڈرونز سے حملہ

شیعیت نیوز: سعودی عرب کے رائل سعودی ایئرفورس کے فضائی اڈے پر حوثی انقلابیوں نے بارودی ڈرونز سے حملہ کرنے کا دعویٰ کیا ہے۔

سعودی عرب بالخصوص سرحدی صوبے جیزان میں ڈرون اور میزائل حملوں کا سلسلہ کافی عرصے سے جاری ہے۔

عالمی خبر رساں ادارے کے مطابق سماجی رابطے کی ویب سائٹ ٹوئٹر پر یمن کی مسلح افواج کے ترجمان یحیی سریع نے سعودی عرب کی شاہی سعودی فضائیہ کے زیر استعمال کنگ خالد ایئربیس پر حملے کی خبر دی ہے۔

یمن کی فوج کے ترجمان نے کارروائی کو کامیاب قرار دیتے ہوئے کہا کہ خمیس مشیط میں واقع الخالد ایئر بیس پر بارودی ڈرونز حملے کئے گئے جس سے بڑے پیمانے پر نقصان پہنچا ہے۔

یہ بھی پڑھیں : جنرل حجازی کا انتقال پر رہبر انقلاب اسلامی کے نام سید حسن نصراللہ کا تعزيتی پیغام

دوسری جانب سعودی عرب کی جانب سے یمنی فوج کے اس دعوے کی تردید یا تصدیق نہیں کی گئی۔ یمن کی عوامی فورس کی جانب سے اس سے قبل بھی سعودی عرب کے ہوائی اڈوں پر حملے کئے جاچکے ہیں۔

یمن کی جانب سے سعودی عرب بالخصوص سرحدی صوبے جیزان میں ڈرون اور میزائلی حملوں کا سلسلہ کافی عرصے سے جاری ہے جب کہ سعودی ایئر ڈیفنس نے بھی ان حملوں کا اعتراف کرتے ہوئے انہیں ناکارہ بنانے کا دعویٰ کیا ہے۔

واضح رہے کہ گزشتہ برس 26 اکتوبر کو بھی حوثی انقلابیوں نے کنگ خالد ایئر بیس پر ڈرون حملہ کیا تھا جس میں فضائی اڈے کی عمارت اور طیاروں کو معمولی نقصان پہنچا تھا۔

یہ بھی پڑھیں : ایرانی فوج کی نقش آفرینی اور آمادگی میں روز بروز اضافہ کرنا چاہیے، رہبر معظم

واضح رہے کہ گزشتہ چھے سال سے یمن کے نہتے شہریوں کے خلاف مسلط کردہ جنگ میں سعودی اتحاد کو اپنے اہداف کو پورا کرنے میں بڑی شکست اور ہزیمت اٹھانی پڑی ہے۔

شدید بمباری، محاصرے اور عالمی طاقتوں کے دباؤ کے باوجود یمنی عوام اور فورسز کے حوصلے پست نہیں ہوئے اور سعودی اتحاد کے مقابلے میں ان کی استقامت و پائیداری نے دشمنوں کے دانت کھٹے کرکے رکھ دیئے ہیں۔